Gula 3
Miduol kanila ni Lito ug Stella ang kawani sa resort nga nagdala og tulo ka swim suit. “Ipasukod lang ni Sir kun hain ang mahusto sa imong kauban,” matud sa lalaki nga kawani sa resort.
Gidala nila ni Lito ug Stella ang tulo ka swim suit didto sa kwarto. “Sigi na Stel, isukod didto sa banyo kun hain sa tulo ka swim suit ang mohaum nimo,” giingnan ni Lito ang dalaga nga misulod usab dayon sa banyo.
Taud-taud, migawas si Stella gikan sa banyo. “Haum ra ba nako ang swimming suit?” nagpahiyom si Stella nga misukna ni Lito. “Wow, angayan ka kaayo Stel sa imong gisul-ob. Makapanglad-ok ta’s laway nga magtan-aw,” ni Lito pa.
Gisud-ong ni Lito nga misamot kaanyag si Stella. Gikan sa iyang panagway, midailos ang panan-aw ni Lito ngadto sa bugdo kaayo nga dughan sa dalaga, ug ngadto sa gamay niini nga tiyan.
Napugngan ni Lito ang paginhawa samtang gitutokan niya ang bugdo nga butang ubos sa pus-on sa dalaga, dayon midailos ang iyang tinan-awan ngadto sa duha ka paa niini.
“Maligo man kaha ta,” matud ni Stella nga maoy nakaputol sa paghanduraw kadiyot ni Lito nga daw natulala sa pagsigi’g tan-aw sa mga hiyas nga naangkon ni Stella. “Aw, sori Stel, makabibihag ka man gud kaayo tan-awon.”
“Dinhi lang ko maghukas sa akong gisul-ob ha?” giingnan ni Lito ang dalaga, ug abtik siya nga mihukas sa iyang T-shirt, dayon gisunod ang iyang karsones. Brep na lang ang nahabilin sa lawas ni Lito.
“Tana Stel,” ni Lito pa. Apan sa wala pa niya buksi ang pultahan, giagbayan niya si Stella. Wala mopakita’g pagsupak si Stella nga giagbayan siya ni Lito.
Naglibog si Lito kun unsa kaha’y huna-huna ni Stella nga miuban man kaniya pakigpanuroy bisan og bag-o pa sila nga nagkaila. Pag-abot nila sa ngilit sa swimming pool nga labing lawom, mibarog si Stella sa kilid.
Tua ra sa pikas tumoy ang duha ka paresan, babaye ug lalaki, nga naligo usab sa swimming pool. “Kamao ka molangoy?” gipangutana ni Lito ang dalaga. “Gamay,” mubo nga tubag ni Stella, dayong lukso sa tubig.
Nakita ni Lito nga mitidlum si Stella sa ilawom ug didto misarap sa kinahiladman, dayon mitunga didto na sa pikas tumoy sa swimming pool. “Dali!” gitawag ni Stella si Lito.
Nasurpresa si Lito sa abilidad ni Stella paglangoy. Misawom usab si Lito paingon sa nahimutangan sa dalaga. (Sumpayan)