Mata sa Kasingkasing

Gula 129

Nakadugang sa kahibulong ni Angeline mao ang kausaban sa tinagdan ni Robert kaniya. Namatikdan niya ang kauga sa pagtagad sa ulitawo kaniya dihang mibalik na ang tingklase ug nagkasulti sila sulod sa library sa eskuylahan nga ilang gitunghaan.

“May problema ka ba, Robert?” Gipangutana ang ulitawo ni Angeline.

“Wa man,” mubong tubag ni Robert.

“Mora man gud og wa ka sa imong kaugalingon. Mora ba’g balewala lang nimo nga nagkauban ta karon.”

“Sorry. Duna lang koy gihunahuna.”

“Unsa kana?”

“Bahin sa labing dakong desisyon nga kinahanglan kong himuon sa akong kinabuhi.”

“Wa ko ikaw hisabti?”

“Sagdi lang. Makasabot ka ra unya kun mabug-os na ang akong desisyon.”

Alang kang Angeline, salabtonon kaayo ang maong sinultihan ni Robert.”

Misamot ang kahibulong ni Angeline kay sukad sa iyang pagbalik sa Tagbilaran gikang nagbakasyon sa Danao, si Robert wala na gyud mobisita sa iyang boarding house. Dili sama sa una nga magkanunayan ang ulitawo sa boarding house nga iyang gipuy-an. -- Sumpayan pa