Timan-i kini, Camilla, nagkanayon si Domingo usa ka higayon niana ngadto sa iyang anak nga dalaga. Dili ko gustong moapil ka na nianang gugma-gugma. Gusto ko’g ma-concentrate ka una sa imong pagtuon. Ang gugma makayabag sa hunahuna. Makadaot kini sa imong pagtuon.
Wala motingog si Camilla. Ang tingog sa iyang amahan maoy masunod sa ilang panimalay. Estrikto nga pagka amahan si Domingo. Higpitan kaayo.
“Dalaga na ang imong anak, Domingo,” namulong ang iyang asawa nga si Dominica.” Ug maanyag pa gyod. Dili kalikayan nga may mangulitawo gayod kaniya.”
“Pwes, kinahanglang molikay siya sa mga lalaki,” ni Domingo pa.
Ang gibaod ni Domingo gisilsil gayod ni Camilla sa iyang alimpatakan. Sa unibersidad nga iyang gitunghaan, daghang mga kaliwat ni Adan nga naninguha pag-angkon sa iyang gugma. Apan gilikayan niya silang tanan, gawas lamang kang Alexander nga mapugsanon ug dili gayod magpabalibad kaniya. Nabatyagan niya nga may pagbati usab siya ngadto sa maong lalaki. Gitago lang nila ang ilang relasyon.
“Mamisita ko nimo sa inyo,” ni Alexander pa usa niana ka udto.
“Dili mahimo,” ni Camilla pa. “Seguradong masuko si Papa kun masayod siya nga gisupak ko ang iyang kabubut-on.”
“Grabe man sab ang imong Papa, uy,” ni Alexander pa. “Mora man og wala siya makasinati og kabatan-on.”
“Pasensiya ka na, Alexander,” ni Camilla pa nga mapangaliyupoon.
“Basta,” ni Alexander pa. “Mamisita gyod ko sa inyo.”
Gikulbaan ug nabalaka si Camilla sa hukom ni Alexander. Tuod man, nianang pagkaugma sa gabii, nahitungha si Alexander sa ilang pinuy-anan. Nagpaila kini ngadto sa iyang mga ginikanan. Apan labihang sukoa ni Domingo. Gihinginlan niini si Alexander sa ilang panimalay. Nakahilak sa kaulaw ug kahiubos si Camilla sa gibuhat sa iyang amahan.
“Kinahanglang makigbuwag ka kaniya, Camilla,” gahot ni Domingo dihang nakalakaw na si Alexander. “Buwagi siya kun gusto kang makapadayon sa pag-eskuyla.”
Wala magtingog si Camilla. Igo lang siyang nagpatulo sa iyang mga luha.
Nianang pagkaugma, nagkita sila si Alexander ug Camilla sa unibersidad nga ilang gitunghaan. Misulod sila sa kantena sa tulonghaan, miorder og pabugnaw. Samtang nangisnak, nagsultihanay sila.
“Giingnan ko na bitaw ka nga estrikto kaayo si Papa,” ni Camilla pa. “Pero dakong sayop ang iyang gihimo,” ni Alexander pa. “Sama ra sa buot niyang bilanggoon ang imong kasingkasing.”
Ang kaestrikto ni Domingo wala makapugong sa pagtunhay sa gugma nila ni Alexander ug Camilla. Gililong nila ang ilang relasyon. Gipatuo ni Camilla ang iyang amahan nga nagbulag na sila si Alexander. Nag-amping lang sila nga dili mabuking.
Usa ka higayon niana, mihagad si Alexander kang Camilla sa pagpanan-aw og sine pagkahuman sa ilang klase. Misanong siya. James Bond movie ang ilang gitan-aw. Paggawas nila sa sinehan, wala makabalibad si Camilla dihang gidala siya ni Alexander sa usa ka pribadong lawak.
Ug ang kinawatkawat nilang panagtagbo sulod sa mabugnaw’ng lawak sa motel nasubli sa makadaghan.
Usa ka buntag niana, mao na lamay nasusihan sa mga ginikanan ni Camilla nga wala siya sa sulod sa iyang lawak.
Ang sulat nga iyang gibilin nakaplagan sa iyang mga ginikanan ug gibasa.
Mahal kong Papa ug Mama,
Pasayloa nga gisupak ko ang inyong kabubut-on. Apan nakahukom kong makigtaban ni Alexander tungod kay gihigugma ko siya. Gani, nagsabak na ko sa bunga sa among gugma. Usbon ko, pasayloa ko ninyo. -- Camilla
Nakumot ni Domingo ang sulat human kini mabasa.
“Kapugngan pay baha, Domingo,” ni Dominica pa. “Apan dili ang gugma.”
Wala makatingog si Domingo. Igo lang mikipatkipat ang iyang mga mata. (Kataposan)