Man Hater

Gula 122

Gikan sa kangitngit mibutho ang anino sa usa ka tawo nga nagdagtom ang panagway. Mao kini ang tag-iya sa mga mata nga kaganina pang naniid sa tanang mga lihok ni Salie. Ang tawo nga nagtago sa kangitngit ingon sa mahinamon nga nagpaabot sa pagbalik sa dalaga.

Mibalik si Salie nga wala’y kalibotan nga adunay nanuod kaniya. Gibuksan niya ang pultahan sa walang kilid sa sakyanan ug sa pagpahiluwan, dihadiha gipaandar niya ang makina. Apan napikal siya kay wala moandar ang makina. Nahapak niya sa iyang kamot ang manibela.

Nanaog siya ug gilamba ang sera sa awto. Gisungog gayod ako’g maayo sa demalas, bagulbol niya sa hilom. Mao pay wala ako tungaha sa lalaki nga akong gikasabot nga mamalaye kanako, karon nadaot pa gayod ang akong sakyanan. Nakapamiste siya sa hilom ug dili oras.

“Buysit!” gitindakan ni Salie nga mapungtanon ang ligid sa awto. Nakumot niya ang iyang buhok.

Ang anino didto sa kangitngit mihinay pagpalayo nga wala mamatikdi ni Salie. Dihang nalamdagan ang tawo sa dan-ag sa sugang dagitabnon sa poste sa unahan, nadayag ang gikuptan sa mga kamot niini. Usa ka putol nga wire! Ang lalaki mipaturatoy ngadto sa kangitngit sa unahan.

Taudtaod nga nagbarog si Salie duol sa iyang awto nga wala masayod unsay buhaton. Unya may sakyanan nga miurong tungod sa gate. Wala mokihol sa iyang gibarogan ang dalaga. Nawala na ang iyang kahinam kun si Yuri na ang miabot. -- Sumpayan pa