Ang kaisog

Gula 6

Human sa ilang pagpangaon, nagkalingaw pagsultihanay sila si Rodel ug Glenda. Usahay, modung-aw si Glenda ngadto sa kinaubsan tungod sa nagkadaiyang kahayag sa lainlaing bahin sa dakbayan kay didto man sila sa kinatas-an sa building.

Ang awto nga tua sa ubos susama na lang kadaku og pusporo kun imong tan-awon tungod sa kahabog sa ilang nahimutangan. “Kasanaw sa ubos Rodel uy,” matud ni Glenda. Wala tuyoa nga nagunitan ni Glenda ang kamot sa ulitawo.

Gikalipay ni Rodel ang paggunit ni Glenda kaniya. “Ay sori, gigunitan man diay nako ang imong kamot Rodel,” ni Glenda pa dihang nakabantay nga migunit diay siya sa kamot ni Rodel.

Wala motubag si Rodel, apan gigunitan niya ang kamot sa dalaga. “Glen, I love you.” Mitutok si Glenda sa ulitawo. “I love you too, Rodel.”

Wala kapugngi ni Rodel ang pagpahiyom nga nakadungog nga gisugot na siya ni Glenda. Gihugtan niya ang pagpislit sa kamot sa dalaga.

“Isaad nako nimo Glen nga ikaw ra ang babaye nga akong mahalon ug pakaslan,” maguwang sa hagawhaw ang tingog ni Rodel samtang gipig-it niya ang kamot sa dalaga.

 “Ako sab Rodel, isaad nako nga ikaw ra ang lalaki nga akong ubanan sa altar sa simbahan,” ni Glenda pa. Nagkasabot sila nga magdisko kay duna may diskohan sa maong building.

Didto sa diskohan, lingaw kaayo sila si Rodel ug Glenda. Giselebrar nila ang ilang pagka sweethearts. Miorder si Rodel og red wine nga maoy ilang giinom. Wala mobalibad si Glenda, miinom siya sa red wine.

“I hope nga dili ka mausab nako Rodel,” giingnan ni Glenda ang ulitawo dihang milunga sila sa pagsayaw ug aron makainom sa ilang red wine. Paglabay sa kapin sa oras, nabatyagan ni Glenda nga nalipong siya tungod sa iyang nainom.

Nakabantay niini si Rodel mao nga midip-ig siya sa iyang girlfriend ug gipasandig kini sa iyang dughan. Gipisil-pisil ni Rodel ang tampihak ni Glenda. Ang maong sitwasyon nakasugnib og talagsaong kainit sa ulitawo.

“Dili na ko moinom Rodel, nalipong na ko,” matud ni Glenda samtang gipiyong ang iyang mga mata. Giipis ni Rodel ang nahabiling bino diha sa botelya. “Tana, manggawas na ta Glen,” giingnan ni Rodel si Glenda.

Mipaingon sila sa elevator aron mohatud kanila sa basement parking diin tua ang sakyanan ni Rodel giparada. (Sumpayan)