Man Hater

Gula 121

Bakakon ka, Yuri! Misinta ang kahiladman ni Salie. Dili tinuod nga sama kamaundanon sa awit nga Power of Love ang gugma mo kanako. Malimbungon ka. Malinglahon!

Daw nawad-an na si Salie sa maayong panghunahuna. Kutob sa iyang nakit-an ug nagunitan iyang gipanglabay. Nag-wild na siya’g maayo.

Misangko nga gikapoy si Salie sa iyang gibuhat. Napasa-pasa ang mga butang sulod sa iyang lawak— wala’y kalainan sa naagian sa makusog nga bagyo.

Ingon sa migaan og diyotay ang iyang pamatyag sa iyang kaugalingon human ikapabuhagay ang nagpuot sa iyang dughan. Mihinay siya pagtindog ug giablihan ang kabinet nga gibutangan sa iyang mga sapot. Namili siya’g maayong isul-ob. Gipagawas niya ang uphagon nga Levi’s, puti nga t-shirt ug itom nga leather jacket. Nagdali siyang nag-ilis.

Gisuling niya ang iyang kaugalingon sa salamin samtang gibutangan og pugong ang iyang buhok. Maanyag gihapon siya bisan og nanghubag ang iyang mga mata sa paghinilak. Apan malaksot ang pagtan-aw niya karon sa iyang kaugalingon — gipalaksot sa kapungot ug kapakyasan nga naglublob sa iyang kahiladman.

Bug-at ang mga lakang ni Salie nga migawas sa balay. Molakaw siya. Wala nay timailhan nga muabot pa si Yuri. Alas otso na sa gabii. Apan daghan pa ang mahimong mahitabo niarong orasa didto sa gawas. Busa molakaw siya ug magpahayahay sa iyang kaugalingon.

Giseguro niya pagkandado ang pultahan sa balay una mosakay sa iyang awto nga nag-urong sa garahe. Paandaron na unta niya ang makina sa sakyanan dihang nahinumdoman niya ang iyang pistola nga gitagoan sa sekreto niyang tagoanan. Mibalik siya pagsulod sa balay ug gikuha ang maong armas. -- Sumpayan pa