Ang kaisog

Gula 3

“Sir Rodel dunay ongoing robbery dapit sa Fuente Osmeña!” nagdali nga mipahibalo kang Inspector Rodel Sigue ang usa niya ka sakop nga nagbitbit og handheld radio. “Tawga ang atong mga kauban, moresponde ta!” ni Rodel pa ngadto sa iyang sakop.

Abtik nga misakay si Rodel sa ilang patrol vehicle. Miwang-wang dayon ang siren sa ilang gisakyan. Samtang nagpaingon sila sa crime scene, napaminaw ni Rodel sa radio nga nangikyas na ang mga tulisan.

Mga sakop sa Motorcycle Response Unit (MRU) maoy milutos sa mga tulisan nga nagsakay usab og motorsiklo.

Mipadayon na lang sila si Rodel sa opisina nga gitulis. Mihimo’g imbistigasyon ang mga sakop ni Rodel ngadto sa kawani nga maoy gitionan sa tulisan. Miduol si Rodel ug napasiga ang iyang mga mata.

“Glenda! Ikaw ba kini?” ni Rodel pa nga wala makasabot sa iyang gibati nga daw nalipay ug gikulbaan. “Rodel? Polis ka na diay?” gikan nga gihakop sa grabeng kakulba apan nakapahiyom lang gihapon si Glenda nga nakakita pag-usab sa kanhi niya higala.

“Suspects apprehended!!” nadungog ni Rodel ang kumonikasyon gikan sa gigunitan niya nga handheld radio. “Bring the suspects to CCPO investigation section,” gimandaran ni Rodel ang mga polis nga nakadakop sa suspetsadong tulisan.

Kataw-anan kaayo ang subli nila nga panagkita ni Rodel ug Glenda. Sa una nila nga panagkita, gikuotan si Glenda sa iyang pitaka sa duha ka mangunguot ug si Rodel ang nakadakop niini dihang tinun-an pa sa Criminology.

Karon, natulis na usab ang opisina nga gitrabahoan ni Glenda ug siya mismo ang gitionan sa tulisan, ug si Rodel usa sa mga opisyal sa kapolisan nga miresponde niini ug maoy nakapatagbo pagbalik sa ilang mga dalan.

Sa polis station, konpirmado nga giila ni Glenda ang duha ka tulisan, ilabi na ang usa nga mition kaniya og pistola. Nasakmit sa mga sakop sa MRU ang duha ka kalibre 45 nga pistola gikan sa duha ka dinakpan.

Nagbayloay sila’g contact numbers si Glenda ug Rodel. “Mag-celebrate ta unyang gabii sa atong panagkita Glenda, dapiton ko ikaw og panihapon,” giingnan ni Rodel ang dalaga. “Sigi, sugot kaayo ko,” ni Glenda pa nga nagngisi.

Misamot kaanyag si Glenda. Wala kapugngi ni Rodel nga mibati og kaibog sa dalaga. Pagka-gabii, gipik-ap ni Rodel si Glenda didto sa iyang boarding house sa dalan Ramos.

“Kumusta ang imong lovelife karon Glen?” gipangutana ni Rodel ang dalaga samtang nagdagan ang ilang gisakyang kotse. (Sumpayan)