Mata sa Kasingkasing

Gula 122

Pagkaugma, sa iyang pagsulod sa school campus, maoy misugat kaniya ang dautang balita. Naaksidente si Robert. Nabiktima kini sa sakyanan nga hit-and run. Talandogon ang kahimtang niini sa Gov. Celestino Gallares Memorial Hospital.

Nabalaka si Angeline sa nahitabo kang Robert. Bisan wala siya mahigugma sa ulitawo apan sa ngalan nga iya kining boyfriend, naluoy siya niini. Tungod tingali kay duna man sab sila’y escapades together.

Sulod sa classroom, wala mahimutang si Angeline. Wala masulod sa iyang alimpatakan ang gileksiyon sa ilang instruktor. Ang iyang hunahuna didto ra kang Robert. Gusto siyang magsusi sa kahimtang niini.

Pag-abot sa iyang vacant period, midalikyat siya ngadto sa Gov. Celestino Gallares Memorial Hospital, aron pagsusi sa kahimtang ni Robert. Padayon pang giatiman si Robert sulod sa emergency room. Ang mga ginikanan ug igsuon ra sa ulitawo maoy iyang gikasulti. Nagpakita sila’g maayong pagtagad kaniya.

“Ikaw diay si Angeline nga hinigugma sa among anak?” Ang inahan ni Robert maoy nangutana.

“Oo,” may kataha ang tingog ni Angeline. “A-ako.” -- Sumpayan pa