Ang Kaisog

Misakay og passenger jeepney si Rodel ug didto siya maglingkod sa luyo nga bahin sa PUJ. Nakit-an gayud niya nga usa sa kauban niya nga pasahero mikuot sa pitaka sa laing pasahero nga babaye.

Gipasa kini dayon sa maong tawo ngadto sa katupad niini nga pasahero nga sigurado siya nga kauban sa mangungoot. Gisigahan siya’s mata niadtong tawo nga mitunol sa pitaka kay nakabantay nga nakakita sa ilang gihimo.

Ang buot ipasabot sa maong tawo nga dili magsaba sa iyang nakita. Tuod, mituktok ang usa niadtong duha ka tawo ug dihang mipahinay na ang PUJ duol sa usa ka habog kaayong building duol sa Fuente Osmeña abtik kining nanaug.

Apan gikalitan ni Rodel og blocking ang ilang tiil ug maayong pagkadusmo sa nag-una ngadto sa ubos. Gitukmod usab ni Rodel kadtong tawo nga nagsunod na usab unta sa pagkanaug.

“Mga mangunguot ni sila. Miss! Tan-awa, wala na ang imong pitaka!” misinggit si Rodel dungan sa pagtan-aw sa babaye nga gikuotan.

Nanaug dayon si Rodel aron dakpon niya kadtong ikaduha nga tawo nga gitukmod niya gawas sa PUJ. Apan nakamaneho na kini sa pagdagan. Kadtong tawo nga nadusmo sa karsada nagluko pa sa kasakit.

“Hilabtanon ka bay, magmahay ka sa imong gihimo,” giingnan si Rodel sa mangunguot.

“Hala wala na tuod ang akong pitaka! Daku-daku ra ba kadto og sulod kay para enroll to,” matud sa babaye ngadto kang Rodel. “Ayaw kabalaka Miss, anaa kaniya ang pitaka nga nakuot adtong tawo nga nakaikyas,” matud ni Rodel.

Taud-taud, may miabot nga patrol car sa Mobile Patrol Group. “Mangunguot ni Sir, mao kini ang ilang gikuotan. Nakaikyas lang ang usa niya ka kauban nga maoy nagkuot sa pitaka aning babaye,” giingnan ni Rodel ang polis.

Girekisa dayon sa polis ang tawo ug nakuha ang pitaka nga diha giluklok sa bulsa sa karsones dapit sa luyo. “Mao ni ang akong pitaka!” misinggit ang babaye nga nakuotan. “Tana, uban namo sa police station Miss, ug ikaw ‘sab sir uban kay aron maimbistigahan ni og maayo,” matud sa polis nga mikwelyo dayon sa dinakpang mangunguot.

Sa police station-2 atbang sa Camp Sergio Osmeña Sr. nagkaila sila si Rodel ug si Glenda, ang biktima sa pagpanguot. “Maayo kay gitabangan ko nimo. Para enroll ra ba ang kwarta nga akong gidala,” matud ni Glenda. (Sumpayan)