Mata sa kasingkasing

Samtang padayong nakighinabi ang taga media sa kapolisan, nasigpatan ni Angeline nga may migawas sa pultahan sa motel. Gigawas na sa taga SOCO ang patay’ng lawas sa biktima. Gisakay kini sa stretcher. Wala maklaro ni Angeline ang panagway sa tawo nga gipatay kay gibukotan man kini og puti nga panapton.

Ingon sa dili na interesado si Angeline nga masayod sa sunod pang mahitabo niadtong dapita. Mibiya na siya didto. Mipadayon siya paglakaw paingon sa ilang tulonghaan.

Pagkaugma, nagbansiwag sa lokal nga pamantalaan sa Bohol ang nahitabong krimen sulod sa motel. Gi-inset gyud sa front page sa Bohol Balita Daily News ang hulagway sa lalaki nga gipatay. Mitingkag ang mga dalunggan ni Angeline dihang iyang gitutokan ang hulagway sa biktima.

Mora’g pamilyar na niya ang panagway. Ingon sa nakita na niya kini sa mga nakalabay nga mga adlaw. Wala lang siya makahinumdom kun diin ug kanus-a niya nakita ang maong lalaki. Basta kay nakaseguro siya nga nakakita na siya niini. -- Sumpayan pa