Ang mga huwes lainlain og pamaagi sa pagtratar og kaso. Depende sa ilang kasinatian sa wa pa sila natudlo nga huwes. O depende sa ilang stock knowledge sa nanglaban pa sila. O depende
sab sa ilang opinion o prinsipyo nga nakab-ot gumikan sa panabot nila sa mga balaod nga nabasa.
Karong kabag-ohan, kun dunay huwes nga bag-ong natudlo, dili una siya pabistahon dayon og kaso. Duna pay hataas nga panahon nga gitawag og immersion time. Sulod ining higayona patambungon ang huwes og daghang mga seminar o symposium. Apan bisan niining mga schooling o training sa usa ka huwes, daghan gihapong mga abogado nga dili kauyon sa pamaagi sa usa ka huwes.
Sama pananglitan ni Atty. Victor Ferrer (dili iyang tinuod nga ngalan). Duna siya’y kaso nga nullity of marriage nga gitambungan niya sa sala ni Judge Henry Jayme (dili iyang tinood ngalan) usa ka RTC judge. Bag-o lang natudlo si Judge Jayme ining salaha isip temporary or detailed judge hulip sa bag-o lang niretiro nga huwes.
Ang mga komentaryo sa ubang abogado mahitungod sa atong judiciary, nag-ingon nga kun may huwes nga tapulan, hatagan og assisting judge. Ug kun may huwes nga kugihan, hatagan og dugang nga mga sala. Daghan mang mga sala nga mabakante og dugay kay ang Supreme Court dugay mang makaatiman sa mga application sa mga abogadong gustong maghuwes. Busa, kun dunay huwes moretiro, duha ngadto sa tulo ka tuig nga mabakante iyang puwestong gibiyaan.
Naanad si Victor sa paagi sa karaang huwes. Ang kaso nga nullity of marriage (pagpadeklarar nga nulo ang kasal) gitratar nga ordinary civil case sa karaang huwes. Apan ang paagi ni Judge Jayme, lahi. Gitratar niya nga Special Proceedings ang maong kaso. Sa pagtawag sa kaso, gimandaran si Victor sa huwes og pamarka og mga dokumento pag-establisar nga may hurisdiksiyon ang husgado sa iyang kaso. Kulang ang mga dokumento ni Victor.
Gisapot siya atubangan sa huwes. Apan wa magpahalata. Nagpahiyompahiyom lang gihapon. “Your Honor, please. May I be allowed to reserve other documents for jurisdictional facts. I left some documents in my office” ni Victor. Daw nagpakilooy sa huwes. Diha ko ’s iyang luyo. Naghuwat nga matawag akong kaso. Nidalikyat gyud si Victor og libak sa huwes. Nilingi siya nako. Ug niingon sa pinahunghong nga tingog “Buang ning huwesa!”
Nakapahiyom lang ko.Ug nakaingon sa akong hunahuna nga ang abogado maoy pinakalibakero nga tawo. Kay molibak sa atubangan sa gilibak. Ang kasagarang libakero, wa sa duol ang gilibak. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)