Due process ug pasaylo (Part 2)

Bahin sa ‘Pagpasaylo,’ mangutana una ko ninyong mga dumadapig sa gisilotan nga mga estudyante. Panahon sa due process, nangayo ba sila’g pasaylo sa mga tagdumala? Kay kun nangayo pa sila, segurado nga dili na maabot sa korte kining maong isyu.

Sa higayon gud nga mangayo ta’g pasaylo, nagpaila kini nga midawat ta sa nahimo natong kasaypanan. Busa, willing ta sa pagdawat sa silot nga alang niini. Apan ang nahitabo lahi. Ang mga ginikanan mideretso’g dangop sa korte, timaan nga wala’y acceptance sa sayop. Busa, imbes mangindahay’g pasaylo, mideklarar hinuon sila’g dakong gubat batok sa STC didto sa nataran sa hukmanan. Kay kun nangayo pa lang sila’g pasaylo, siyento porsiyento nga pasayloon gyud sila sa mga madre, sa mga kasingkasing nga iyaha sa Ginoo.

Gani, bisa’g wala sila mangayo’g pasaylo, gipasaylo lang gihapon sila sa STC. Luyo sa kalapasan nga ilang nahimo, wala gyud sila hagbonga sa subject, diin adto kini angay ipahamtang. Makaapekto baya sa Good Manners and Right Conduct (GMRC) kining gibuhat nila. Pwede kaayo nga adto sa subject relative to GMRC nga ang maong mga estudyante hataga’g falling grade. Apan tungod sa gugma ug kaluoy sa mga madre ngadto sa mga anak ug parents, gipapasar lang gihapon silang tanan. Pero, dili lang nila papasohon.

Hibawo ba mo nga daghang graduates ang nagplanong moprotesta ug mo-walkout kun gipaapil pag paso ang mga kauban nilang nakasala? Kini tungod kay prinsipyo, prinsipyo! Sayod man gud sila unsa kahigpit ang mga madre bahin ining magsul-obsul-ob og bikini. Gani, base sa nangaging kasinatian, may mga estudyante nga miapil-apil og beauty pageant contest, kinsa wala na dawata sa eskuylahan. Ang nagtupis pa kahang hulagway sa Facebook nga naggunit og beer, unya nagkimpit pa gyud og dinagkotang sigarilyo?

May kaluoy pa gihapong nagpabilin sa kasingkasing. Wala hagbonga sa STC ang mga bata tungod kay naghatag lang kini’g dugang dakong gasto sa salapi, kahago ug panahon sa part sa parents ug ilang mga anak. Tiaw bay, usa ka tuig nimong balikon ang usa ka subject aron ka lang makagraduwar?

Nan karon, diin ba nga nahimong unfair ang mga madre sa ilang desisyon? Due process? Nahatag na! Pasaylo? Nahatag na sab! Apan importante lang gayod nga ilang hataga’g disciplinary action ang nakalapas sa mga balaud sanglit nagbadlis man kini’g samad sa hamis nga imahen sa STC. Busa, angay lang nga tambalan aron maalim ug magpabiling hamis nunot sa pagpanglabay sa mga malinglahong panahon.

Timan-i. Ang samad nga dili madapatan og epektibong medisina, dili gyud mamaayo. Hapdos lang gyud kaayo tinuoray paminawon ang tukmang tambal nga daling makaalim.