Man Hater

Gula 114

Wala man kini makakita apan ingon sa nalandongan niini ang nahitabo nilang duha sa sulod sa balay ug tungod ba kaha sa kalagot gihapak niini’g kusog ang manibela.

Sa dayon nang pauli ni Yuri nianang pagkabuntag ang ulitawo misaad kang Salie nga siya mobalik uban ang iyang mga ginikanan aron mamalaye kaniya ug kini gikahinangop pag-ayo sa dalaga.

Paghitalikod ni Yuri, si Salie miadto sa merkado ug nangompra. Namalit siya’g mahikay alang sa ilang panihapon.

Gisunod niya ang pagpanglimpiyo sa balay. Iyang giuna ang pagpahimutang sa mga bulak sa kaang didto sa lagwerta. Iyang gibisbisan og tubig ang mga orchids sa hardin. Iyang gisilhigan ang palibot.

Gilimpiyohan niya ang sala ug ang mga kuwarto sa balay. Giilisan niya’g kurtina ang mga bentana ug pultahan ug giilisan og hapin ang mga kama. Giayo niya pagpahimutang ang mga kasangkapan sa kusina.

Pagka-alas kuwarto sa hapon napahimutang na ni Salie ang tanan. Milingkod ang dalaga sa sala ug mipahulay. Mao pa niya batia ang kakapoy tungod sa mga bulohaton nga iyang giatiman nianang adlawa. Nagkapuliki siya’g maayo. Mipahulay lang siya’g kadiyot kaganina sa tingpaniudto ug unya mibalik dayon sa bulohaton. Maayo gani kay nahuman niya ang tanan nga wala hiabti sa kangitngit.

Mibagting ang telepono nga diha sa iyang atubangan gipatong sa usa ka talad. Mialimbukad ang usa ka masanagong pahiyom sa mga ngabil sa dalaga. Excited siya kaayo. Nagtuo siya nga si Yuri ang nanawag kay nagsabot man sila nga manawag kini kaniya. Gidali niya pagpunit ang awditibo ug gitapion sa iyang dalunggan. Apan nabalaw siya kay si Allan ang didto sa pikas linya.

Nahipos ang kasadya nga mitaob sa nawong ni Salie. Apan bisan pa nakigsulti siya kang Allan.

“Nganong wa ka man mo-report karon sa office?” Pangutana sa potograpo sa ilang publikasyon. “Si Sir nangita nimo.” -- Sumpayan pa