Jealous Guy

Gula 5

Nahimong special guest ni Shirley si Emil nianang gabhiona. Human sa pagpangadye sa ika-40 ka adlaw gikan sa pagkamatay sa bana ni Shirley, nangaon ang mga bisita.

Si Shirley gayud maoy mihatag og pagkaon ni Emil nga didto maglingkod daplin sa bentana. “Ayaw lang kaayo pagtagad Shir, unaha ang uban nimo nga mga bisita,” matud ni Emil bisan og gikalipay niya ang gihimo ni Shirley kaniya.

Taud-taud, nakita na lang ni Shirley nga ang duha ka tuig niya nga anak ug sa namatay niyang bana naglingkod na sa paa ni Emil. “Uy, maayo kay miduol kana siya nimo Mil nga pilian man kaayo na siya og higalaon,” matud ni Shirley.

Wala lang motingog si Emil, igo lang niya nga gipahiyoman si Shirley. Human makakaon ang mga bisita, nag-ulhos-ulhos ra kini pagpamauli. Hangtud nga si Emil na lang ang nahabilin sa balay ni Shirley.

“Nahuman na gayud ang imong problema Shir, ang huwaton nimo ang hubkas na usab sa imong bana,” ni Emil pa. “Mao lagi, kwarta na usab ang problema inig-abot sa maong higayon,” matud sa gwapa nga byuda.

“Moinom ka ba Mil? Naay daghang bino kay hilig man kadto moinom og imported wines ang akong bana,” giingnan ni Shirley si Emil. Igo lang miyango si Emil nga nagpasabot nga moinom siya.

Nag-andam si Shirley og binuak-buak nga ice aron gamiton nga pagbugnaw sa imported nga bino nga gidalit niya ni Emil. Miipis si Emil og usa ka “shot.”

“Shir, ubani ko’g inom,” giingnan ni Emil ang gwapa nga byuda nga iya nang nahigala. “Dili kaha ta mahubog ana Mil?” ingon sa nagduha-duha si Shirley apan gipaundayonan lang niya si Emil.

Gihisgutan nila ang gisaad ni Emil nga tabangan si Shirley nga makasulod og trabaho sa City Hall, ingon man ang pag follow-up ni Emil sa burial assistance tungod sa pagkamatay sa bana ni Shirley.

Nakita ni Emil nga natulog na sa katre sulod sa kwarto ang dos-anyos nga anak ni Shirley. “Siradoan ko lang tingali ang pultahan Mil kay alas 11 na sa gabii basin og sudlon ta’g kawatan,” matud ni Shirley.

“Nalipay kaayo ko Mil nga nagkaila ta kay nakatabang ka nako. Salamat kaayo sa gipahuwam mo nako nga kwarta ha kay makabayad na ko sa akong utang sa tindahan sa Insik,” giingnan ni Shirley si Emil. Mora’g nagsapid na ang iyang dila.

“No, dili nako kadto pailisan nimo Shir. Tabang nako kadto para dili ka na kaayo maproblema. Sultihi lang unya ko pananglit duna kay problema,” ni Emil pa. (Sumpayan)