Gula 4
Mapahiyumon si Emil nga nagmaneho sa iyang motorsiklo pauli sa iyang panimalay. Nahimuot si Emil sa kalamboan nga nasuod niya si Shirley, ang gwapa nga byuda sa namatay.
Igo gayud nga miabot si Emil sa ilang balay sa Barangay Capitol Site, mitingog ang message alert sa iyang selpon. "Thank you Emil nga miuban ka sa akong kagul-anan."
Si Shirley diay ang mi-text ni Emil. Nagbayloay sila og mga text messages nga maoy nakapasamot sa ilang panagsuod. Milabay ang daghang mga adlaw nga na-busy si Emil sa iyang trabaho, wala na siya maka-text ni Shirley.
Didto sa iyang opisina usa ka hapon niana, nasurpresa si Emil kay mitawag kaniya si Shirley sa iyang selpon. Giawhag siya nga patambongon sa ika 40 nga pangadye sa namatay niyang bana.
Misaad si Emil nga moadto sa balay nila ni Shirley inigkagabii. Wala gayud sipyata ni Emil ang iyang pasalig kang Shirley kay pagawas niya sa trabaho didto na siya moderitso sa balay sa byuda.
"Uy hala, sayo ka lagi miari Mil?" matud ni Shirley nga nagngisi. "Nakobra na ba nimo ang dies mil pesos nga burial assistance gikan sa City Hall Shir?" gipangutana ni Emil ang gwapa nga byuda.
Daw nakalitan si Shirley. "Naa diay? Wala ko mahibawo ana Mil." Nasayran ni Emil nga rehestrado nga botante kadtong namatay nga bana ni Shirley mao nga may madawat si Shirley nga hinabang gikan sa City Hall.
"Tabangan tika nga ma-process ang imong burial assistance sa City Hall Shir. Higala nako si Ben Baculi nga maoy nagdumala sa Burial ug Medical Assistance Program sa City Hall," matud ni Emil.
"Bitaw uy, tabangi baya ko Mil ha kay daku-daku na gayud ko og nautang nga kwarta sa Insik nga tag-iya'g tindahan diha sa unahan. Nasabtan ra ba nako nga lain siya'g tumong nako," ni Shirley pa.
Nakasabot si Emil sa panginahanglan ni Shirley. "Ayaw'g hatagi og kahulogan Shir ha, tabangan tika. Bayari ang nautang nimo sa tindahan para wala ka nay huna-hunaon," giingnan ni Emil si Shirley.
Gitunolan ni Emil og lima ka tagsa ka libo ka pesos si Shirley. "Salamat kaayo Mil ha... mabayran na gayud nako ang kapin sa tres mil pesos nako nga utang sa tindahan sa Insik," matud sa byuda.
Taud-taud, nangabot ang mga silingan ni Shirley nga mosabat sa pangadye sa ika-40 gikan sa pagkamatay sa bana ni Shirley. "Ayaw lang ipanug-an nga gihatagan tika'g kwarta Shir ha?" hagawhaw ni Emil kang Shirley. (Sumpayan)