Mata sa Kasingkasing

Gula 117

Pero nakaamgo ko karon nga dili diay mahimong itakli ngadto sa laing binuhat ang pagbati nga alang sa babaye nga maoy matuod kong gimahal.”

“Managsama diay ang mga sirkumstansiya nga nahitabo nato, Erik.”

“Nganong nakasulti ka man og ingon niana, Angeline?”

“Tungod kay wa sab ko mahigugma kang Robert. Gipahungaw ko lang usab ngadto kaniya ang akong pagbati nga alang unta sa lalaki nga maoy matuod kong gihigugma apan wala mahigugma nako!”

Nakamatikod si Angeline nga gitutokan siya ni Erik. Dihang gitan-aw niya ang ulitawo, nagkatinutokay sila. Si Angeline ang unang nibawi sa iyang panan-aw. Miduko siya sa atubangan ni Erik.

“Kun mao kana,” ni Erik pa. “Dili diay tinuod ang imong giingon kaganina nga nagmalipayon ka sa relasyon ninyo ni Robert kay laing lalaki man diay ang imong gihigugma.”

“Nagmalipayon gihapon ko kay nagbinuotan man si Robert sa among relasyon,” kadali rang nakabunlot og taphaw nga pagpasabot si Angeline aron pagtabon sa tinuod. -- Sumpayan pa