“Wa ko ikaw basola, Angeline. Igo lang kong nagpahungaw sa akong gibati. Sa akong problema kang Almina.”
“Kinahanglang dawaton mo na si Almina isip kabahin sa imong kinabuhi, Erik. Labi na karon nga nagsabak siya karon sa inyong anak.”
“Ambot lang, Angeline. Ambot lang.”
Sa hilom nakaingon si Angeline nga pareho sila’g kapalaran ni Erik sa ilang pagpakigrelasyon sa opposite sex. Kay dili man tinuod ang iyang pangangkon sa atubangan ni Erik nga malipayon siya sa relasyon nila ni Robert. Wala siya mahigugma kang Robert. Ug si Erik wala sab diay makat-on paghigugma kang Almina.
“Aduna pay laing hinungdan kun nganong gipangulitawhan nako si Almina bisan wa ko mahigugma niya,” takulahaw lang namulong si Erik.
“U-unsay buot mong ipasabot, Erik?” Pakitubod ni Angeline.
“May gihigugma kong babaye. Pero nagtuo kong wa siya mahigugma nako. Hinigala lang tingali ang iyang pag-ila nako. Maong gipahungaw nako ngadto kang Almina ang akong gugma nga alang unta sa babaye nga maoy matuod kong gihigugma. -- Sumpayan pa