Gula 2
Gisubay-subay ni Emil ang mga gagmay’ng karsada sa Barangay Tisa nga gitug-an kaniya sa tanod nga didto magpuyo kadtong namatay nga gilubong kaganinang hapon.
Hapit nahurot-hurot na niya’g libot ang bisan gagmay’ng karsada sa Tisa apan wala siya makakita og timailhan nga adunay nagpundok nga mga tawo nga mosabat sa pangadye.
May misantop sa huna-huna ni Emil. Nahinumdom siya sa punerarya nga nagserbisyo sa paglubong niadtong patay nga gipatukaran og Jealous Guy. Gikontak ni Emil ang ilang opisina ug gipapangita ang telepono sa maong punerarya.
Taud-taud, nakadawat siya’g text message nga adunay numero sa telepono. Gikuha ni Emil ang iyang PLDT landline ug gikontak ang numero sa punerarya Impas.
Gipangutana niya ang nakatubag sa address niadtong namatay nga gipatukaran og Jealous Guy. Nakakatawa ang nakatubag kay usa diay kini sa nahimong sumsoman sa mga kawani sa punerarya.
“Sir, taga Rivaridge, Tisa to ang namatay… dapit sa ibabaw na sir,” matud sa nakatubag. Tuod, wala pa maadto ni Emil ang maong dapit mao nga mipasirit siya sa maong lugar.
Gipasiklapan niya ang iyang relo, nakita niya nga hapit na alas utso sa gabii. Sagad sa pangadye alang sa patay sugdan kini alas utso sa gabii. Gihunongan ni Emil ang usa ka edaran nga babaye.
“Nang, asa dapit ang balay adtong namatay nga gilubong ganina, kadto gani nga gipatukaran og Jealous Guy?” gisukna ni Emil ang hamtong babaye. “Ay, kadtong bana ni Shirley? Tumoy aning karsadaha Dong,” matud sa babaye nga mitudlo sa unahan.
Tuod. Wala mosipyat ang pagpangita ni Emil. Nakit-an niya nga atubangan sa usa ka balay, dunay tulda nga gipahimutang nga may daghang tawo nga naglingkod.
Milingkod si Emil sa bakante nga lingkoranan. Naniid siya ug taud-taud, misalmot siya sa panagsultihanay sa mga lalaki.
“Buanga bay, daghan kaayo ang nalingaw sa lubong ganina nga love songs ang tukar dili sama sa uban nga Ave Maria,” matud sa usa ka lalaki. “Bisan ang taga punerarya bay nalingaw ‘sab,” tubay ni Emil.
Nagpasumangil si Emil nga mangihi sa daplin sa koral, apan gitawag niya ang usa ka batan-ong lalaki. “Dong, unsay ngalan sa namatay nga bana ni Shirley?”
Nasayran ni Emil nga Marlon diay ang ngalan sa namatay. Misulod si Emil sa balay ug miipon sa mitambong sa pangadye. Gipasuroy ni Emil ang iyang mga mata sa pagpangita sa batan-ong byuda. (Sumpayan)