Asa naka dapita?” matud pa sa teks nga gibasa ni Hyacinth. Gikan kining mensahe sa iyang ikahimamat karo’ng teksmet nga si Reyboy. Dugay nang nagkateksmet si Hyacinth ug ang maong lalaki apan karon lamang sila nagkasinabot nga magkita sa personal.
“Nia nako sa gikasabotan tang kan-anan sulod niining mall,” reply usab ni Hyacinth. Unya pipila lamang ka gutlo human siya maka-reply may naaninaw siyang usa ka lalaki sa unahan ug paingon mosulod sa kan-anan nga iyang nahimutangan. Ingon sa sinati kaayo ni Hyacinth ang pamayhon sa maong tawo ug dinhi misugod ang pagkulba sa iyang dughan.
“Kumosta ka Hyacinth?” sa lalaki pa dihang miduol kini kaniya ug mitimbaya.
“Uy Norman! Nia lagi ka?” nahibong pakisayod ni Hyacinth.
“Ahh ... kuan Cinth, kanang may gisugo kanako ang among boss dinhi,” dason ni Norman ug sama sa nangurog ang iyang tingog.
Si Norman ang kababata ug kanunay nga kaduaw ni Hyacinth uban sa iyang kaluhang si Jasmine sa gagmay pa sila. Bisan tuod sa kalinghod pa sa ilang pangidaron ug tuytoy pa nga hunahuna kaniadto mibati na sila’g kaibog sa usa’g-usa. Apan walay swerte si Hyacinth tungod ang iyang kaluha ang napangasawa sa iyang higala.
“Pagtarong ba! tug-ani ako sa matuod nganong ania ka karon dinhi,” subling pakisusi ni Hyacinth ngadto sa bayaw dungan sa mas mikusog nga gibating kakulba.
Ingon sa dili makaharong pagtan-aw ang iyang bayaw kaniya. Tungod niini gidayal ni Hyacinth ang numero sa selpon ni Reyboy ug dako ang iyang kahingangha sanglit mitingog usab ang selpon ni Norman diin nagpasabot kini nga si Reyboy ug Norman usa ra.
“Pasayloa ko Cinth,” ni Norman nga miduko nalang sa iyang ulo dungan sa pagpangutkot sa iyang buhok tungod sa kauwaw. Migamit ko’g lain nga sim sa kabalaka nga masuko ka kung imong mahibaw-an nga ako ang imong kateksmet. Ug aron sa pagtago ko usab niini ngadto ni Jasmine,” dugang pa niya.
“Ikaw gayud diay, daan pa gyud ko!” ni Hyacinth nga may katahap usab diay sa iyang bayaw nga maoy iyang kateksmet.
“Nganong karon man lang hinuon ka diin mga minyo na kita? Nakabalo ka ba nga dugay na akong nagahulat nga padaygan sa imong gugma ug nasakitan ako pag-ayo dihang nagminyo kamo si Jasmine, tungod kay nagahandom lamang ako sa walay klaro. Ug maayo nalang gani nga diha si Mario nga walay siguro apan mihupay sa nagluha kong kasingkasing,” dugang pa niya apan may tuno sa pagmahay.
“Usbon ko, pasayloa ako,” ni Norman nga nakabaton na karon sa kaisog. “Ang tinuod ikaw ang matuod kong gimahal. Bisan kaniadtong nga sip-onon pa kita ikaw na ang gipitik ning akong dughan, apan nabalaka ako nga kini ra usab ang moguba sa maayo tang relasyon isip managhigala. Mao kadtong nakahukom na lang ako sa pagtipig niini ug gipangasawa ko ang kaluha mong si Jasmine,” unya mitutok siya ngadto sa kababata.
“Apan pakyas ako sa paghipos niini tungod kay hangtod karon ikaw pa gihapon ang gisampit niining akong kasingkasing,” dugang hagawhaw ni Norman dungan sa pagkupot sa tuong kamot sa higala.
“Tawo lamang ako Norman ug dili perpekto kung sayop man ang pagdawat kanimo, dili ko kini isapayan,” ni Hyacinth ngadto sa iyang ka eyebol.
Unya mao na lamang ang ilang nabatyagan nga daw nagdilaab sa kainit ang hubo nilang kalawasan ibabaw sa kama sulod niining mabugnaw nga lawak. (Katapusan)