Man Hater

Gula 105

“Ikaw baya ang una ug kataposan kong gugma. Sakit kaayo kun mapakyas. Mahimong kasilagan ko ikaw sa tibuok kong kinabuhi kun imo kong pahilakon. Naglaom baya ako sa imong gisulti.”

“Isaad ko, Sal, nga ikaw ra ang akong higugmaon.”

Nag-akob na usab, sa makausa pa, ang ilang mga ngabil.

Ang misunod nga mga adlaw maoy mga takna sa kalipay ug matam-is nga pagbinatiay sa duruha ka binuhat nga nagkahigugmaay. Malipayon kaayo si Salie. Ang iyang hunahuna didto ra kang Yuri. Mora’g kinamayan ang mga gutlo sa iyang kinabuhi. Natugkad niya nga tinuod kadtong giingon ni Vilma nga nindot ang adunay hinigugma. Namatud-an niya nga si Yuri buotan ug mapinanggaon. Nakita niya niini ang kaligdong ug kamatinud-anon nga nakapawagtang sa iyang kabalaka nga mahitabo kaniya ang gidangatan sa iyang inahan ug igsuon.

Madasigon siya kanunay ug saya ang panagway. Ang iyang mga kauban nga nakamatikod sa kausaban sa iyang mga lihok nagmatingad-on kaniya. Si Vilma ang maoy suod nga nakapaniid sa kausaban nga iyang gipakita wala makapugong pagbuyag kaniya. Apan wala niya tug-ani ang babaye bahin kanila ni Yuri. Lain ang iyang gipangatarongan nganong malipayon na siya kanunay.

Si Allan usab wala na gayod magsamok kaniya. Ingon sa gidawat na niini ang kapakyasan ug ang kamatuoran nga dili niya maangkon ang dalaga. Daw nakaamgo ang ulitawo nga si Salie dili alang kaniya. Busa wala’y suliran sila si Yuri ug Salie sa ilang relasyon.

Usa ka higayon niana nga wala pay udto -- si Salie sayo nga migawas sa publikasyon. Gisultihan niya si Vilma nga may mahinungdanon siyang asikasuhon. Apan ang tinuod nagsabot sila si Yuri nga manuroy, mangaon sa gawas ug dayon manan-aw og sine. Gipadaplin una niya ang iyang trabaho sa publikasyon aron lingawon ang iyang kaugalingon. -- Sumpayan pa