Human sa Kalipay

Pwerteng layoa sa panan-aw ni Rosita nga gipunting niya ngadto sa mangiob nga gawas sa bilanggoan. Unang gabii pa kini niya sa bilanggoan human siya gidakop kay gikatahapan nga maoy nagpatay sa usa ka lalaki sulod sa motel.

Wala tuyoa ni Rosita nga sa tanto niyang tutok sa mangiob nga gawas sa bilanggoan, nangambak ang mga lusok sa luha ngadto sa iyang manggahon nga aping. Apan wala siya magbasol sa iyang gihimo nga pagpatay ni Frank.

Alang kang Rosita tukma ang iyang gihimo tungod kay giguba ni Frank ang masanag unta niya nga kaugmaon pinaagi sa pagpatuo nga wala siya’y kabilinggan ug andam kini nga siya pakaslan. Mikagot ang mga ngipon ni Rosita nga naghandom sa mga adlaw nga gilikay-likayan na siya ni Frank human matagbaw sa iyang lawas. Apan diha’y kabahin sa iyang paghandom nga gusto usab niya nga lab-ason sa iyang kaisipan.

Kapin gayud sa tulo ka tuig ang ilang relasyon ni Frank ug Rosita. Mora na gani og bana ang iyang pagtan-aw ni Frank sa tulo ka tuig nila nga relasyon.

Wala gayud siya magtuo nga gibakakan ra diay siya ni Frank nga nagpatuo nga usa kini ka ulitawo. Nagpangedaron pa og 27-anyos si Frank ug batan-on kini og panagway nga sa iyang tan-aw mora lang gani og 21-anyos.

Ang wala lang mabantayi ni Rosita nga si Frank panagsa ra kaayo makig-uban og pagpanuroy kaniya panahon sa gabii kay adto man kini sa iyang pamilya.

Dili na maihap ang mga higayon nga gidimdim ni Frank ang iyang pagkababaye sulod sa tulo ka tuig kapin sa ilang relasyon.

Nagtrabaho kaniadto si Rosita sa usa ka mall sa North Reclamation Area ug didto sila unang nagkita si Frank nga mipalit kaniya og polo shirt. Nakigsuod kaniya si Frank ug nagbayloay sila og contact numbers. “Pwede ba og ihatud tika sa imong pagpauli unyang gabii Rose?” ni Frank pa nga pwerteng nakatutok ni Rosita. Dili ikalimod nga maanyag gayud si Rosita kay gani bisan ang mga kauban niyang babaye modayeg man kaniya.

“Layo-layo ra ba ang among balay gikan dinhi sa SM kay sa Labangon man ang amo,” giingnan ni Rosita si Frank. “Walay problema Rose, duna ko’y motor ug dali ra kaayo na daganon,” dali nga tubag ni Frank.

Pagka gabii, mibalik g’yud tinuod si Frank sa gitrabahoan ni Rosita. “Huwaton lang tika sa coffee shop diha sa unahan Rose,” ni Frank pa nga mitudlo sa coffee shop. (Sumpayan)