Mata sa kasingkasing

Mibati na hinuon og kaluoy si Angeline kang Robert. Nakita man gud niya nga may kausaban na ang kinabuhi sa ulitawo. Nagtarong na kini sa pag-eskuyla human niya tambagi. Ug bisan palikero kini, ni-behave kini sa iyang atubangan sa higayon nga sila’y mag-uban.

Iyang namatikdan nga may dakong respeto si Robert sa iyang pagka-babaye ug naningkamot kini nga ma-apreciate niya ang binuhatan niini.

Ug ang kaluoy nga iyang gibati ngadto kang Robert mao tingali ang sinugdanan aron ma-develop siya sa paghigugma ngadto niini. Kana kun tinuod nga ang kasingkasing katudloan aron mahigugma.

Sa gihapon, may daghang reservation si Angeline. Anaa ang kabalaka nga tingali’g dula-dulaan lang siya sa usa ka lalaki nga iyang ikarelasyon.

Negatibo ra ba kaayo ang iyang hunahuna? O, mapanagan-on lang siya kaayo? O kaha sa gisagop niyang konsepto nga ang mga guwapa ray dunay katungod nga higugmaon? Dili siya gustong masakitan! -- Sumpayan pa