Swimming Lesson

Gula 7

Giduol ni Zeny ang tiguwang nga caretaker sa apartment nga miawhag kaniya nga adto na lang pakatulga si Philipp sa iyang kwarto tungod sa wala gayud moundang nga uwan.

"Di ba lain Nong nga lalaki man ang akong ig-agaw?" ni Zeny pa. "Ig-agaw gud na nimo." sa tiguwang pa nga nagtoo gayud nga ig-agaw ni Zeny si Philipp.

Maikog usab nga mobalibad si Zeny kang Philipp. Mitindog si Zeny ug miyango ngadto ni Philipp nga nagpasabot nga misugot na siya nga adto matulog sa iyang kwarto ang bag-o niya nga nahimong boyfriend.

“Sayo lang og bangon ugma ha kay aron walay makakita nimo nga dinhi ka matulog sa akong kwarto gawas sa tiguwang caretaker sa apartment,” giingnan ni Zeny si Philipp. “O lagi, ikaw g’yud,” ni Philipp nga makalukmay ang tinan-awan.

“Kiss ko nimo bi,” matud ni Philipp nga miagbay dayon ni Zeny. Wala gayud makabalibad si Zeny nga sa unang higayon nahagkan sa reporter. Gigakus siya ni Philipp ug giukoban ang mga ngabil.

Wala na gayud mag-usik og higayon si Philipp. Gigamit na niya ang abilidad niya pagromansa’g babaye. Wala siya mosipyat kay anam-anam nga nalukmay niya ang pagbati sa call center agent. Nadungog pa nila ang kusog nga tinagasak sa uwan didto sa gawas. Takulahaw usab nga misakdap sa naglatagaw nga kaisipan ni Zeny kadtong mga higayon nga mahikapan ni Philipp ang mga sensitibong parte sa iyang lawas samtang gitudloan siya’g langoy didto sa dagat kaganina sa una nilang panagkita.

Karon ania na silang duha sa lawak nga sila rang duha. “Kun wala pa nato ingna nga mag-agaw ta dili g’yud mosugot si Manong nga pasudlon ka diri sa kwarto,” hagawhaw ni Zeny kang Philipp.

Gipadayon nila ang pagparayganay hangtud nga nanginit ang ilang kalawasan. Gikablit ni Philipp ang switch sa suga nga diha duol sa pultahan og takulahaw lang nga mingiob ang tibook lawak.

“Philipp unsa man kining atong gibuhat?” ni Zeny sa hagawhaw nga tingog. “Ayaw kabalaka Zeny, ulitawo ko ug andam manubag kun unsay sangpotan sa atong pagahimoon,” abtik nga tubag ni Philipp sa hagawhaw gihapon nga tingog.

“I love you Zeny.. Zeny…I love you too Philipp.” Mga alas kwatro sa kaadlawon nga migawas si Philipp sa kwarto ni Zeny. Hinay ang iyang linaktan aron dili mahigmata ang tiguwang caretaker nga naghugdong sa lamesa.

“Bye Philipp, teks lang unya,” ni Zeny pa human siya hagki ni Philipp sa dayon niining palayo gikan sa apartment tabok sa dalan Colon. (Kataposan)