Kasina

Nahunong si Simon pagtuki sa mga plano nga iyang pirmahanan dihang mikiring ang cell phone ni Ramon, iyang kumpare ug kauban sa opisina. Pulos sila consultant sa RTN Mining Co., Rio Tuba, Bataraza, Palawan. Mobisita lang sila sa minahan og kinse ka adlaw mata’g bulan. Lima na sila ka tuig nga nagbalikbalik sa Rio Tuba, Bataraza, Palawan.

Sa pagyanghag ni Simon maoy iyang nakita ang nagkurog nga kamot ni Ramon nga nagbasa sa cell phone. Nagping-it ug nanubod ang luha sa iyang mata. Wala kapugngi ni Simon ang pagpangutana: “May balita nga ngil-ad Pre?”

Inay motubag, gitunol ni Ramon ang cell phone ngadto ni Simon nga may salabtunong pagtugot.

Gibasa ni Simon ang ‘text message’ nga gikan sa doktor, anak ni Ramon:

“Dad, ang panakit sa imong bukton dili ordinaryo nga panakit nga bation sa lawas. Sumala sa resulta sa eksaminasyon, may ‘cervical slip discs’ sa imong liog. May mga ugat nga konektado sa imong bukton ang nangapiit. Kinahanglan nga maoperahan ka dayon aron dili maparalisar ang katunga sa imong lawas. Tungod niini, nagkinahanglan ka og taas nga pahulay. Gidili na nimo ang pagbiyahi og lagyo sama sa imong ‘consulting visit’ sa minahan sa Palawan matag bulan. Kinahanglan nga moundang kana sa imong trabaho sa Rio Tuba, Palawan. Ang gilay-on nga dosentos saysenta (260) kilometros gikan sa Puerto Princesa paingon sa Rio Tuba mokabat og unom ka oras nga biyahi sa van nga inyong sakyan. Ang maong gidugayon, makabun-og sa imong lawas. Ang dagko ug lawom nga libaong sa dalan sa lungsod sa Espanyola nga inyong agian ... mora og alig-igon ang imong lawas ... maoy lig-on nga katarungan nganong nagkauyon kaming imong mga anak nga paundangon ka gayud namo sa imong trabaho sa Palawan. Labot pa usab, sa imong pangedaron nga saysentay otso anyos, angay kana nga mopahulay. Panahon na nga kaming imong mga anak makapakita na sa among pagtahud ug pagpangga kanimo pinaagi sa buhat. Ayaw’g kaguol sa imong impasunon nga utang pagpatukod sa atong balay. Sa among gikasabutan, si Junjun nga atua magtrabaho sa Dubai maoy motiwas pagbayad sa binulan nga datahan sa Metro Bank. Kami si Natan ug Alma; maoy magbahin sa gastohan sa imong operasyon, binulang bayranan sa kuryente, tubig, telepono, tambal ug sa inyo unya’ng pagsuroysuroy ni mama    Layla. I love you Pa.”

Human mabasa ni Simon ang text message, gitunol pagbalik ang cell phone dungan ang pangutana:

“Unsa may imong hukom karon Pre?”

“Tumanon ko ang hangyo sa akong mga anak. Sulatan ko ang atong kompaniya nga kutob na lang sa katapusang adlaw sa Enero, 2012 ang akong pagserbisyo. Mao na kini ang katumanan sa akong pangandoy nga moundang na sa pagpanarbaho.” Tubag ni Ramon nga mapahiyumon, human masayod sa pasalig sa iyang mga anak.

Ang saya’g nga pahiyom ni Ramon nagpugas og kasina sa kinailadman ni Simon.

Aron mahanaw ang kasina nga gibati ni Simon, nag-ampo siya sa hilom: “Lord, salamat sa kahimsog sa akong panglawas. Ayaw itugot nga takboyan kini og balatian sama sa nahitabo sa akong Pare Ramon, aron lang makaundang sa trabaho. Dako ang akong paglaom nga tungod sa akong edad nga saysentay nuybe anyos na, ang akong mga anak makahunahuna pagpaundang sa akong trabaho bisan og lig-on pa ang akong lawas. Ibta kining kasina nga miturok sa akong hunahuna. Nahadlok ako nga makagamot kini, motubo ug mamunga og mas daghang sala.” (Katapusan)