Gula 101
Ug musantop unya sa kaisipan ni Yuri nga dili kay siya ra ang bugtong babaye dinhi sa kalibotan. Makakita pa si Yuri ug daghang babaye nga mas buotan ug maanyag pa kay kaniya. Ug dili lisod si Yuri higugmaon sa usa ka babaye tungod kay gawas nga kini ambongan, buotan ug masinaboton pa gayod.
Apan kun pananglit iyang sugton si Yuri, nahadlok usab siya nga ang pagpakigrelasyon niya sa lalaki magdulot lang kaniya’g dili matukib nga mga kasakit ug kagul-anan sa kapulihay’ng mga adlaw. Sama sa nahitabo sa iyang inahan ug igsuon. Ang ilang amahan mibiya kanila ug ang iyang manghod igo lang gipahimuslan sa lalaking wala’y puangod — nga mao gani hinungdan nga nakapanumpa siya sa iyang kaugalingon nga dili ug dili gayod siya manarato. Dili ba posibleng mahitabo usab kini kaniya kun sugton niya si Yuri? Gikulbaan si Salie nga nagpalandong niini. Dili siya buot masakitan. Dili siya buot nga mahitabo kaniya ang nahiagoman sa iyang inahan ug igsuon. Gitimbangtimbang niya’g maayo ang angay niyang buhaton. Giabot siya’g kalibog sa unsay ipakanaog nga hukom.
Si Yuri wala paluba sa iyang tinguha nga maangkon sa hingpit ang gugma ni Salie ug ang pagsalig niini kaniya. Bisan kun ang dalaga hugot nga midumili pagdawat sa talagsaong pagbati nga iyang gipadayag niini, si Yuri wala gayod kahubsig paglaom nga muabot ang higayon nga si Salie abton og kaluoy kaniya.
Usa niana ka gabii, samtang si Yuri namisita kang Salie, gidaygan kini sa ulitawo sa usa ka pangutana nga wala’y lipodlipod iyang gibungat atubangan sa dalaga.
“Salie, tug-ani ko sa tinuod. Nganong dili ka man mosugot nako?
“Dili ba gisultihan na tika sa una nga dili ko manarato? Nga higala lang ang pag-isip ko kanimo?”
“Kun dili ka manarato, duna gayo’y bug-at nga hinungdan?” -- Sumpayan pa