Swimming Lesson

Gula 6

Misakay sila’g taksi si Philipp ug Zeny paingon sa gipuy-an sa dalaga ngadto sa downtown area. “Gabii na man mohapit ka pa?” gisukna ni Zeny ang reporter nga si Philipp human sila makakanaug sa gisakyan nilang taksi.

Gitutokan ni Philipp si Zeny sa tinutokan nga daw nagdala’g “come here.” Gigunitan ni Philipp ang kamot sa dalaga ug giingnan. “Ganahan g’yud kaayo ko kun imong pasudlon kay laksot kaayo kun anhi ta sa karsada magsultihanay, gabii na ra ba.”

“Sige sulod na lang. Pero kun makamata gani ang caretaker sa apartment, pagpaila nga mag-agaw ta ha?” matud ni Zeny. Wala g’yud masayop si Zeny kay pagsulod nila diha si Manoy Estong nga piniyalan sa apartment nga iyang gipuy-an.

“Mao ni si Philipp Nong Estong, akong ig-agaw. Gusto siya nga motan-aw sa akong gipuy-an,” ni Zeny pa nga napugos sa pagpamakak kay dili siya buot masayran nga nanguyab kaniya ang tawo nga misulod niining lawom na nga takna sa kagabhion.

Didto sila milingkod sa gamay’ng sala-sala sa apartment. Taud-taud, mibunok ang kusog nga uwan. Saba kaayo ang tinagasak sa uwan nga moigo sa atup nga sin. Nakahigayon si Philipp sa pagsukna kang Zeny kabahin sa iyang gugma.

Nakahigayon usab sila kay nakatagpilaw ang tiguwang nga caretaker. “Sige, sugton tika apan ayaw pagtoo nga humok ra kaayo ko’g ilong ha nga misugot nimo bisan bag-o pa ta nagkaila. Ambot, gaan kaayo ang akong pagbati nimo Philipp,” ni Zeny pa.

Daw naglumpayat sa kalipay ang kasing-kasing ni Philipp. Gusto niyang gakson si Zeny apan nabalaka siya nga makit-an unya ni Nong Estong kay gipatoo ra ba nila kini nga mag-agaw silang duha. “Salamat kaayo Zen nga wala ko nimo pakyasa,” matud ni Philipp.

Malipayon sila nga nagsultihanay. Wala gayod sila abota og duka samtang nagsultihanay. Nakatulog na si Nong Estong. Gipasiklapan ni Philipp ang iyang relo ug nakita niya nga ala-una na sa kaadlawon ug wala pa motuang ang kusog nga uwan.

“Day Zeny, wala pa g’yud mohunong ang uwan. Diha na lang pakatulga sa imong kwarto kanang imong ig-agaw,” giingnan ni Estong si Zeny dihang ang tiguwang nakamata sa iyang pagtagpilaw.

Wala makatingog si Zeny. Gitutokan niya si Philipp nga nagpahiyom. “Bitaw Zen, sa kwarto na lang ko nimo matulog kay kusog kaayo ang uwan,” matud ni Philipp. (Sumpayan)