Si Jesucristo gibutangbutangan. Sa Iningles pa, falsely accused. Gisilutan sa kamatayon. Way bistabista. Pagbuot ra sa kadaghanan sa mga tawo ang iyang silot. Sama sa people power karong panahona. Apan ang dunay gahum nga buhian siya ug dili silutan, mao si Pilato. Matud si Poncio Pilato “Wa koy nakitang sala ining tawhana!” Gobernador siya.
May gahum. Apan nganong wa niya gamita iyang gahum? Kay politiko man siya. Ug ang politiko gusto mang malipay niya tanang tawo. He wanted to please all people. Kaniadto ang mga grupo sa mga tawo naila nga mga Saduceo, Pariseo ug mga Magtutudlo Sa Balaod. Kining magtutudlo sa balaod, sama tingale sa mga abogado karon. Kay kaniadto wa may bar exams. Basta nagtuon sa balaod, ug nakamao, puwede na magtudlo sa balaod. Ang grupo nga wala lang mahisguti sa Bibliya mao ang grupo sa mga doktor. Duna na say docktor kaniadto. Wa lang seguro naggrupo.
Way kalainan ang mga panglantaw sa mga politiko karong panahona. Gusto silang humot sa tanang katawhan. Grupo sa administration, opposition, independente, mga negosyante ug masa. Sa panahon ni Jesus, gikontrahan siya sa tanang grupo sa tawo. Sa mga Pariseyo, Saduceo, mga abogado (kay usbon man niyang balaod) sa mga mananambal nga lisensiyado (kay dili man siya lisensiyado nga doktor ug nangayog mga masakiton) ug sa gobyerno (kay mora man siya’g rebelde, ug ang simbahan ug gobyerno kaniadto, usa ra). Kini una atong tukion sa Kuwaresma.
Si Jesus usa ka maayong tawo. Nindot ug maayo iyang tanang pagtulon-an. Pero nakabantay ba mo? Nga hapit tanang sangyaw sa mga relihiyon (bisa’g unsang relihiyona) maihap rang panahon nga gamiton nila ang mga pulong ni Jesus. Kasagaran gyud mga pulong ni Pablo, Pedro, Juan, Santiago o unsa pa na. Ngano man? Kay lisod man lubagon ang mga pulong ni Jesus. Kay ang mga pulong ni Jesus makahimong perpekto sa tawo. Ug matud pa sa kadaghanan, wa may tawong perpekto. Sayop ang kadaghanan. Kay sa Bibliya, kun ayohon gyud ninyo pagbasa, daghang tawong perpekto sama nilang Enoch, Job, Samuel ug uban pa.
Unya moingon pa gyud ang mga relihiyoso “Jesus died because of our sins” Tinood ba ni? Namatay si Jesus duha na ka milinyo ang nakalabay. Wa pa ta matawo adtong panahona.Kay wa pa natawo, wa pa ta nakasala. Mao nay giingon sa military “brain washing, guilt tripping, endoctrination ug scare tactic”. Mao ni upat nga paagi sa usa ka simbahan nga ang tawo mahimong panatiko sa iyang tinohoan. Pero kun basahon nimo ang mga pagtulon-an ni Jesus, siya mismo dili panatiko. Karong panahona, daghan pang magpatay tungod sa relihiyon. Nga puro kono sila alagad sa Diyos. Ang Diyos gugma. Apan wa silay gugma sa dili miyembro sa ilang relihiyon. Mao ba ni ang pagtulon-an ni Jesus? Tataw nga dili.
Atong palandongon kun unsa ka huyang si Pilato. Duna siya’y gahum sa pagpabuhi ni Jesus. Apan ang mga tawo iyang gipabuot. Imbis si Jesus ang pabuhian nga way sala, si Barabas hinoon nga usa ka kriminal. Tan-awag unsa kadautan ang mga tawo adtong panahona. Apan mao gihapon karon. Daghan gihapong dautan sama adtong naninggit, nga si Barabas pabuhian ug si Jesus ipalansang sa krus. Perpekto kaha sila sa ilang pagtoo sa kaugalingon?
“Manghunaw ko ini. Wa koy labot sa kamatayon ining Jesus!” matud ni Pilato atubangan sa katawhan. Unsay tubag sa mga tawo? Matud sa mga tawo “Ang kastigo sa iyang kamatayon ihampak ngari kanamo ug sa among mga kaanakan!” Mao nay sulti/singgit sa mga tawo. Bisa’g basahon pa ninyo ang Bibliya aron makita gyud ninyo. Mao na nga kun ayohon lang nato’g basa ang Bibliya ug sabton nato pag-ayo, dili na Good News. Good history lang na, kay dunay nindot ug maayo nga mga pagtulon-an. Duna lay saad nga kastigo sa tawo hangtud sa iyang kaanakan.
Mao nga kun kita adunay mga problema sa kuwarta (kay mao man gyud nay unang problema sa tanan), panglawas, ug relasyon sa pamilya, silingan ug isig ka tawo, dili ta angay maghikog. Kay nakaambit lang ta sa kastigo sa kamatayon ni Jesus. Gipaambit lang ta sa pag-antos ni Jesus. Labi na kun ang atong mga katigulangan apil sa pagsinggit pagpalansang sa krus ni Jesus. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)