Man Hater - Gula 100

N-nakagusto ko nimo, Yuri,” lugos makagula ang tingog ni Salie, tungod kay akong nakita nga matinud-anon ug buotan kang pagkatawo. Isip higala, nakadayeg ko nimo. Apan kutob ra diha sa panaghigala dili na molapas diha ang atong kasuod.”

Pagkadungog sa giluwatang hukom sa dalaga, si Yuri igo lamang miduko nga ginuntan sa lawom nga panghupaw. “Okey lang, Salie, kun kana ang imong desisyon,” mikagalkal ang tingog sa ulitawo, mora’g tarong gibasal. “Apan dili gihapon ko magpakawala sa paglaom. Kinsay nasayod nga moabot ang higayon nga abton ka’g kaluoy ug patalinghogan mo na ang akong pangindahay.”

Kahilom. Si Salie wala motingog. Miduko kini.

Nanamilit ug mitalikod si Yuri nga huyhoy ang mga abaga.

Nianang gabhiona wala makatulog sulod sa iyang lawak si Salie. Nagduhiraw ang iyang hunahuna samtang naghayang ibabaw sa mahunol-hunol nga higdaanan. Diha sa iyang dughan, gitapin-an niya sa duha ka kamot, ang mga bulak nga gihatag ni Yuri kaniya. Ang iyang galamhan gisaog sa tumang kalibog ug kakulba. Wala siya masayod kun unsay maayo niyang buhaton.

Giabot ang dalaga og kaluoy kang Yuri. Sukad sa una nilang panagkita gaan ang iyang buot ngadto sa maong lalaki. Naglibog siya sa iyang kaugalingon. Unta maglagot man siya sa mga lalaki. Apan ngadto kang Yuri pulos pagpakaaron-ingnon ang iyang nahimo. Nakapamalandong siya sa hilom nga si Yuri nakaangkon og luna sa iyang kasingkasing. Milambo ang iyang pagbati tungod sa kabuotan nga gipakita ni Yuri. Bation niya ang tumang kalipay kun magkita sila.

Ang pagpangulitawo ni Yuri gihinuktoka’g maayo ni Salie. Giabot siya’g kabalaka niining hugtanon niyang pag-ayad sa gugmang gipadayag sa ulitawo kaniya. Dili ba kaha kabsan sa pailob ang ulitawo? Ug hayan makahukom sa kapulihay’ng mga adlaw nga kini molikay ug dili na mopakita kaniya? -- Sumpayan pa