Mata sa Kasingkasing - Gula 104

Nagkadungan sila’g sulod sa tulonghaan nianang pagkapalis.

“Unsang orasa?” Pangutana ni Robert.

“Mga 6:30,” tubag ni Angeline.

“Bakante ko nianang orasa. Ngano man diay?”

“Pakuyog unta ko nimo. Manuroy ta bisan asa.”

“Okey. Deal.”

Tuod man, human sa ilang klase sa sayong kagabhion, nagdungan sila si Angeline ug Robert paggawas sa tulonghaan. Nanihapon una sila sa usa ka outlet sa Jollibee. Pagkahuman, nanuroy sila sa plasa.

“Nabag-ohan ko sa imong mga lihok karon, Angeline,” gikan ni Robert. “Mora’g duna kay dakong problema.”

Gitutokan ni Angeline si Robert. Sa hilom nakaingon siya nga husto ang pangagpas ni Robert nga aduna siya’y problema. Problema sa gugma.

Kay bisan pag inanay na siyang nakadawat sa kamatuoran nga ang lalaki nga iyang gihigugma gipanag-iya na sa laing babaye, dili man madali ang pagkaalim sa samad nga namugna niini sa iyang kasingkasing. -- Sumpayan pa