Man Hater - Gula 98

Sa wala pa siya mopauli sa iyang gipuy-an (gikan sa kuwartel sa kapolisan), si Salie mihapit sa simbahan sa Mabolo. Misulod dayon siya sa nag-arkong ganghaan sa balay-alampoanan. Wala’y misa niadtong higayona. Dihay pipila ka mga tawo nga nagluhod. Dihay nagrosaryo.

Mipaso siya sa tungang agianan sa simbahan. Maoy iyang gipunting ang unang talay sa mga lingkoranan atbang sa talad diin anha himoa sa pari ang kasaulogan sa santos nga misa.

Miluhod siya ug nangaliyupo. Maduloton nga nag-ampo. Nangayo siya’g panabang sa Labaw’ng Makagagahom nga unta lamdagan ang iyang hunahuna ug panultolan sa angay’ng buhaton. Nga unta maantigo na siyang mopasaylo sa mga tawo nga nakasala kaniya.

Nagpasalamat siya sa Dios nga wala siya mahimong kriminal nga dili siya ang nakapatay kang Roger Justiniano. Nagbayad na kini sa iyang kasal-anan nga nahimo ngadto sa mga babaye busa angay na niyang kalimtan ang nanglabay’ng panghitabo. Ang nangagi, nangagi na.

Kun unsa siya kadugay sa iyang pagluhod wala siya masayod. Gigamhan siya sa iyang pag-ampo. Nanguros siya ug mitindog. Ang relo sa iyang bukton nagtug-an nga hapit na ang ikatulo nga takna sa kahaponon. Migawas siya sa simbahan. Himatikdan niya ang tumang kahayahay sa iyang dughan. Gaan usab ang iyang pamati sa lawas.

Miligdas ang daghang mga adlaw. Usa niana ka gabii nga lapas na sa ikapito ang takna samtang si Salie nag-andam sa manuskrito alang sa iyang lindog, dihay sakyanan nga mihunong sa tungod sa iyang gipuy-an. Midungaw siya sa bentana. Nakita niya ang usa ka tawo nga nagtindog tungod sa pultahan ug naglantaw sa sulod sa lagwerta. Mora’g gusto kining mosulod.

Midali siya paggawas kay namay-ongan niya ang pamarog sa maong lalaki. Sinati niya ang bayhon niini. Wala siya magduhaduha sa pag-abli sa pultahan. Sumpayan pa