Wala ma-develop

Dear Tita Salie,

A pleasant day. Just call me Miles, minyo ug may 2 ka mga anak. Ang akong problema kabahin kini sa akong kaminyoon. Mora ko og gikapos nga wala na gyoy kahigayonan nga akong matangtang ang hikot nga gikapos kanako. Ang nakapait kay nisugot man god ko nga gapuson sa kahigayonan.

8 years na akong minyo ug nakasal sa lalaki nga wala ko mahigugma. Bata pa kaayo ko nga nakauyab niining akong bana. Ug tungod sa kainit sa dugo kay lagi mga batan-on pa man kami, dali ra kaayo ko nga nabuntis. Ug tungod lagi kay nagmabdos na ko gusto sa ginikanan sa akong uyab nga makasal dayon mi aron pagtubag sa sala nga nahimo sa ilang anak ngari kanak. Aron dili usab ako mauwawan nga nabuntis na, nisugot ra usab ako nga makasal mi bisan kun wala ko mahigugma sa akong uyab.

Samtang nagtipon ming duha kay magtiayon na man mi nanghinaot lang gyod ko nga ma-develop ko sa akong bana ug ma-inlove ko pag-ayo kaniya. Apan nilabay na lang ang walo ka tuig wala gyod ko ma-develop sa akong bana. Nagpakaaron-ingnon na lang ko nga mahal nako siya aron dili siya masakitan kay mahal ra ba kaayo ko niining tawhana.

Karon naa koy nakaila nga lalaki. Ambot sukad nga nagkaila mi, magsige na man ko og hunahuna niya. Unya kun magkita mi kiligon kaayo ko niya, Tita. Wala gyod ni ma-feel nako sa akong bana. Kahibalo gyod ang Diyos nga naningkamot ko nga ma-develop sa akong bana apan wala gyod.

Unsa may akong buhaton, Tita? Palihog pasabta ko. Thank you. -- Miles

* * *

Dear Miles,

Kun magpadayon ka sa imong binuang, sa imong pagsige og pakigkita nianang maong lalaki, segurado ko nga mas mosamot gyod nga wala na kay gana sa imong bana. Mas mosamot nga mawad-an ka og interest sa imong pamilya. Ug mas mosamot usab kadako ang imong problema.

Ang akong pangutana kanimo kun nganong imo mang gisugot ang imong bana dihang nanguyab siya nimo kun wala ka pay gugma niya? Nganong nagpa-jerjer ka man niya sa imong kabatan-on kun wala kay gugma nianang imong bana? Dili ko motuo nga wala kay gugma niya. Aduna kay gugma niya, apan kini hinayhinay nga nawagtang tungod kay wala ninyo ampingi. Tungod kay bata pa mo nga ni-enter sa gugma, giabot mo karon og kapuol. Kay dili moabot og 2 ang inyong anak kun wala ka pay gugma kaniya.

Misamot pa gyod ang inyong problema tungod kay nakabaton ka man karon og inspiration. Mas mosamot pa gyod og kabati ang imong bana niini ug wala kay laing makita nga nindot kun dili kining lalaki sa imong kinabuhi karon.

Maoy hinumdomi nga minyo kana ug dili na husto nga mo-entertain pa ka og laing lalaki. Undangi ang imong binuang bisan pa man kun kiligon ka niya. Maoy paningkamoti nga mo-work pagbalik ang imong relasyon ngadto sa imong bana aron maayo ang dagan sa inyong pamilya. -- Tita Salie