Ug giputol na nila ang ilang panagsulti. Wala makapugong si Erik kang Angeline dihang misulod na siya sa boarding house bisan gusto pa untang makigsulti kaniya ang ulitawo.Apan pagkaugma didto sa ilang eskuylahan, wala siya lung-i ni Erik atol sa iyang vacant period. Napugos si Angeline sa pagpakigsulti sa ulitawo sulod sa canteen sa eskuylahan.
“Boyfriend ba nimo si Robert?” Takulahaw lang nangutana si Erik kang Angeline.
Wala dayon motubag si Angeline. Mitutok siya kang Erik.
Nakabaton og diyotay’ng kalibog si Angeline. Ngano bang gusto man nga manuheto si Erik sa iyang kinabuhi?”
Managhigala tuod sila apan wala kana magpasabot nga i-open niya ngadto sa ulitawo ang tanang butang mahitungod sa iyang kinabuhi, labi na gyud bahin sa pribadong aspeto. May limitasyon sila sa usa’g-usa.
“Tubaga ko, Angeline,” gikan ni Erik. “Gisugot na ba nimo si Robert?”
“Wa pa,” laktod nga tubag ni Angeline. “Giobserbahan ko pa ang iyang mga lihok. Ngano man diay?” -- Sumpayan pa