Man hater

Pagka-alas nuybe imedya diha na si Padre Giovani Tortor atubangan sa altar sa simbahan, kay sugdan na ang seremonyas. Ang pundok sa mga batan-ong mag-aawit andam na sa ilang pagaawiton nga diha magtapok duol sa nahimutangan sa organo diin si Rufo Montevero, ang organista, andam na usab sa huning iyang tugtogon nga naglingkod atubangan sa instrumento.

Mikilab ang mga gutlo ug miusa ang kahilom dihang gisugdan ang seremonyas sa pagkasal nilang Roger ug Lorrene. Diha sa altar atubangan sa pari, ang duha wala’y timik nga namati dihang ang pari misugod pagbasa og pipila ka bersikulo sa Bibliya nga gikuptan niini.

Gikulbaan si Salie nga nagtan-aw sa duha. Karon na niya buhaton ang iyang gilaraw ngadto kang Roger. Wala na siya maghunahuna’g lain. Bisan unsay mahitabo iya gayod kining buhaton ipanimalos na niya ang kamatayon sa iyang igsuon! Bahala na’g unsay iyang dangatan human unya sa iyang panimalos kang Roger. “Ikaw, Lorrene Delampes,” misukot ang pari sa babaye, “dawaton mo ba si Roger Justiniano nga maoy mahimong kapikas sa tibuok nimong kinabuhi?”

“Oo, Padre,” mitando ang babaye.

Mipaduol pa gayod si Salie sa gikasal. Mikusog ang butokbutok sa iyang dughan. Nag-anam og sulod ang panulay sa iyang pangisip.

Miabot na ang higayon, Roger, nga ako makabalos sa imong gibuhat sa akong manghod. Didto molugan-ob kining mga pulonga sa kahiladman ni Salie samtang gihinay na niya’g paggawas ang pistola gikan sa iyang shoulder bag.

“Ug ikaw, Roger Justiniano, dawaton mo ba isip imong asawa si Lorrene Delampes?”

Sa dihang motubag na unta si Roger aron pagsanong sa dako uyamot nga pag-uyon sa gipangutana sa pari, kalit milanog ang usa ka masipang buto sa pistola. Ug naigo si Roger diha gayod sa iyang dughan! -- Sumpayan pa