Gula 94
“Tingali nagkasinabot na kita nianang bahina,” matud ni Yuri. “Kun may problema ka, ilabi na kun bahin sa imong trabaho ug nagtuo ka nga makatabang ko, ayaw pagpanuko sa pagdangop kanako. Andam ako sa pagtabang kanimo sa tanang higayon.”
“Daghang salamat, Yuri,” ang nalitok lamang ni Salie.
“Have a nice day, Salie,” ni Yuri.
Ug ang ulitawo gayod maoy mihangyo nga ibutang na nila ang telepono. Didto sa suok sa hunahuna ni Salie buot pa unta siyang makigsulti kang Yuri. Apan wala siya’y nahimo. Gibutang na ni Yuri ang awditibo human kini makapanamilit kaniya.
Taudtaod nang gikabutang ni Salie ang telepono apan wala pa siya makalihok sa iyang gilingkoran. Si Yuri maoy diha sa iyang hunahuna. Tinuod gayod nga gentleman si Yuri, wala makapugong si Salie sa pagdalayeg sa lalaki sa hilom.
Sa hilom nalipay si Salie nga nagkasinabot na sila si Yuri. Dili na kini magsamok kaniya bahin sa gugma.
Sa kinabuhing wala’y kabilinggan ug sa panuigong kawhaan ug lima, si Salie ingon sa nagmalipayon nga ang hunahuna ug panahon nasipong sa iyang trabaho sa publikasyon. Nadugangan ang iyang buluhaton ug kaakohan kay miusbaw ang iyang katungdanan ngadto sa pagka-Metro Editor sa Moon-Star Daily diin moagi gayod kaniya ang tanang mga balita nga hinagdaw sa mga reporter ug koresponsal alang sa Metro Section sa maong mantalaan.
May pipila ka ulitawo nga kaubang empleyado usab sa Sunlight Publishing gawas kang Allan nga nakagusto sa dalaga ug gustong mopadayag sa ilang gibati ngadto kaniya. Apan wala sila makaatraka. Nahadlok sila sa man hater nga dalaga. Wala’y usa kanila nga nangahas ug nagpatugatuga.
Si Salie hugot gayod nga naglikay sa mga lalaki. Gipugngan ug gilig-on niya ang iyang kaugalingon nga dili magpatental sa mga lalaki bahala’g matigulang siyang dalaga. -- Sumpayan pa