Nangilad sa iyang abogado

Si Mirasol ra gyud ang mabasol sa iyang gidangatan. Badlongon man gyud siya nga pagkababaye. Unya ang iya pa gyung abogado gipabadlongan. Nagbarog karon siya atubangan sa huwes sulod sa husgado sa Municipal Trial Court sa lungsod sa Bagabad.

Sa iyang wala nagbarog sab rong buntaga si Atty. Jack Tibon. Niprangka ang abogado ngadto ni Judge Jaime Gimarangan Jr. nga moluwat na siya sa katungdanan isip abogado ni Mirasol. Kay si Mirasol dili makabayad sa serbisyo sa abogado. Ug paorderan siya’s huwes nga magpalaban na lang sa Public Attorney’s Office. Nakiha’g duha ka kasong estafa si Mirasol kay sige’g pangutang sa mga silingan ug higala unya way bayadbayad. Na-dismiss ang usang kaso sa technicality.

Sa ka buotan ug ka manggiloy-on ni Atty. Tibon, tinunga ang hangyo ni Mirasol sa acceptance fee sa abogado. Imbis tagkinse mil ang duha ka kaso. Nahimo na lang siyete mil. Unya data pa gyud ang bayad ni Mirasol nga dunay karenderya sa baryo Vadgita sa ilang lungsod. Ang appearance fee ni Atty. Tibon usa ka libo lang. Unya sa niaging Nobiyembre nga appearance fee, giutang pa ni Mirasol. Nisaad si Mirasol nga mobayad sa petsa uno sa Disyembre. Wa gyud nitunga sa bupete sa abogado. Puwerteng lagota sa abogado. Nag-andam og suwat kasaba para sa kliyente. Kay ang sunod nga mga bista Marso 2 ug 9, nitunga si Mirasol sa bupete sa abogado pagka sayong buntag sa Marso 2. Gipabasa dayon siya’s suwat.

“Dear Mirasol, Tataw na nako sa imong lihok nga ikaw tinuod gyud nga mangingilad. Maayo unta kun laing tawo lang imong ilaron. Apan ang sakit sa akong buot, nga ako imong abogado unayon nimo sa pag-ilad. Sa gikaingon ko na kanimo sa nanglabay’ng panag-istorya nato, kun ang criminal tambagan sa abogado og tinood mahitungod sa balaod, mosamot ka criminal. Mosamot siya kadautan. Sama nimo nga nisamut ka mangingilad. Kay ang balaod naghatag man og importansiya ug mas bug-at nga pabor sa katungod sa criminal. Mas importante ug mas bug-at pa sa biktima. Apan ang nakaparat nga dihang nisamot ka ka-mura tungod sa tambag sa abogado, ang abogado imo sang giapil og pagbiktima sa imong ka-maru.

Sama ra nga ako ang nagtaud nimo og sungay. Maayo lang unta kun laing tawo lang imong sungayon. Apan giapil nimo sa pagsungay ang abogado nimo. Busa aron dili ko hisungayan nimo pag-usab, maayo nang magbuwag na lang ta sa maayong kabubut-on. Pangita na lang og laing abogado nga dili sakitan kun imong ilaron o sungayon. Husto na ka’s kagamitan sa panggubatan sa kinabuhi. Hitsas na ka sa gamit sa pangilad. Taas, lig-on ug hapit na imong mga sungay. Busa, andam ka na og sinungayay sa bugno sa kinabuhi.

Klaro nga duna kay bisyo nga nakahimo nimo nga usa ka mangingilad. Wala gani seguro masayod imong bana. Nakasabot ko sa imong sitwasyon isip adik sa bisyo sama sa sugal ug uban pa. Wa kay control sa imong kaugalingon. Apan wa koy labot sa imong kinabuhi.

May labot lang ko sa imong kaso. Apan kay ang imong pagtagad sa abogado, imong biktima, dili na ko manggilabot sa imong kaso aron dili na ko mabiktima nimo pag-usab. Busa, pasayloa ko nga mobiya sa imong kaso. Manghinaut ko sa imong suwerte. Atty. Tibon.”

Paghumag basa ni Mirasol, gihatag ni Atty. Tibon iyang folder sa kaso. Ug wa na naningil sa giutang nga appearance fee. “Sige. Pauli na” ni Atty. Tibon. Dili siya kamaong mopasakit og istorya sa tawo. Maong iya nalang gisuwat. Duha ka oras nga wa nikihol si Mirasol sa iyang gilingkuran. Di makatrabaho’g laing kaso si Atty. Tibon kun may tawong nagtungok sa iyang opisina. “Sige, kun magbinut-an na ka nako, dad-a imong bana karong hapon. Kay kami mag-istorya. Ug karon pakita lang sa husgado. Ingna ang huwes gihilantan imong abogado. Sa sunod bista kun di ka kabayad daan nako’g tres mil, penalty ang laing usa ka libo, mutambong gihapon ko’s husgado. Aron mananghid sa husgado nga mobiya ko nimo” ni Jack.

Gimandoan si Mirasol sa huwes nga mo-report sa PAO. Minghoy iyang nawong paggawas sa husgado. Wa pa gani seguro kun kalipikado ba siyang labanan sa PAO. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)