Gula 5
Gibati og kalooy si Saling kang Arman nga nagkabuwag kini ug ang iyang girlfriend. Suod na sila kaayo si Arman ug nasabtan niya nga wala na gani siya isipa nga katabang sa balay.
Pagka buntag. Gibantayan ni Saling nga mogawas na si Arman sa kwarto aron iya kini dayon nga matimplahan og coffee. Sagad g’yud nga alas sayes mobangon na ang ulitawo apan karon hapit na alas siete wala pa kini mobangon.
“Saling, kun mahigmata na gani si Arman ingna nga naglakaw-lakaw ko paingon sa GMA-7 kay aron singuton ko kay taud-taud na nga wala ko’y ehersisyo,” matud ni Nang Dading.
Nagtuo si Saling nga ang rason nga wala dayon makabangon ning buntaga si Arman mao ang subra niini nga nainom sa miaging gabii. Nakahuna-huna siya nga pukawon ang ulitawo sa kwarto.
Gituktok ni Saling ang pultahan ug nabantayan niya nga wala diay ma-lock ang siradora. “Ablihi lang ang pultahan Ma,” nadungog ni Saling ang tingog ni Arman sa sulod. Nagtoo kini nga ang iyang inahan maoy nanuktok.
Gibuksan ni Saling ang pultahan ug nakita sa dalaga nga naghigda pa si Arman. “Arman, alas siete kinse na. Hubog kaayo ka gabii sa imong pag-abot, gusto ka nga dad-an lang tika og coffee dinhi sa imong kwarto?” gisukna ni Saling si Arman.
“Palihug ko Ling ug salamat kaayo,” matud ni Arman nga nagpiyong gihapon ang mga mata. Human makatimpla og coffee si Saling, nag-andam usab siya og binasa nga face towel nga itrapo sa nawong ni Arman aron dali mahuwasan.
Misulod si Saling sa kwarto dala ang coffee. Gitabangan niya si Arman nga makalingkud human niya gibutang ang usa ka tasa nga coffee sa gamay’ng lamesa.
“Trapohan ko usa ang imong nawong Arman. Mahinumdom g’yud ko sa akong igsoon nga akong trapohan kun mahubog,” ni Saling pa. “Sige inom usa sa imong coffee,” matud ni Saling dihang gitrapohan niya ang wala nga bukton sa ulitawo.
Mihigop si Arman og coffee. Gisundan kini og lain pang higop sa init-init nga coffee. “Nagmata na ba Ling si Mama?” gipangutana ni Arman si Saling. Gitug-anan ni Saling si Arman nga nagpasingot pinaagi sa paglakaw-lakaw si Nang Dading.
Gitrapohan na usab ni Saling ang tuo nga bukton ni Arman. Gitutokan ni Arman si Saling. “Maayo unta Ling kun makakita ko’g laing girlfriend nga buotan sama nimo dili sama sa akong maluibon nga girlfriend,” ni Arman pa. (Sumpayan)