Housemaid

Gula 3

Gituman ni Saling ang gisulti ni Arman nga ibutang sulod sa kwarto tupad sa kusina ang iyang gidala nga bag. Migawas lang usab dayon si Saling ug mideritso pagpanghugas sa ilang gikan-an ug nanglimpyo sa kusina.

Nag-ilis si Arman kay mo-report na sa iyang trabaho. Paggawas niya aron magsul-ob sa iyang sapatos, nakita niya si Saling nga nagpasinaw sa igsusul-ob niya nga sapatos.

“Uy, salamat kaayo Saling ha?” nagpahiyom si Arman nga midali-dali og sul-ob sa sinaw na nga sapatos. “Ako unta kadto ang mo-shine sa imong sapatos Dong apan iya man ko nga gipulihan,” matud sa inahan ni Arman.

Pagka hapon, sayo nga nahiuli si Arman ug nakita niya nga hapsay kaayo ang ilang balay ug limpyo ang palibot. Pagsulod niya sa balay, nakita niya ang iyang inahan nga nagtan-aw sa balita sa television.

“Nagkalingaw na lang ko og tan-aw’g balita sa TV kay wala na man ko’y trabahoon, kugihan kaayo si Saling uy. Nalipay g’yud kaayo ko Arman nga siya ang nakuha nimo nga kauban nato sa balay,” matud sa inahan sa ulitawo.

Milingkod si Arman sa sala ug mitan-aw kadiyot sa balita sa TV. Taud-taud, miduol si Saling ug mitunol kang Arman og basa nga face towel. Nabag-ohan si Arman ug gibati og talagsaong kalipay.

“Salamat kaayo Ling,” matud ni Arman nga nanarapo sa iyang nawong sa basa nga face towel. Nakabantay si Arman nga daw nausab ang pamayhon ni Saling. Dili na siya sama kaganinang buntag nga nagkita sila didto sa terminal nga daw bukidnon kaayo’g dagway.

Nagdungan sila og panihapon. Mitabang ang inahan ni Arman sa pagpanglimpyo sa kusina human sa ilang pagpangaon dayon silang tulo nanan-aw og salida sa Cable TV sa sala.

Nalingaw kaayo si Arman kay action movie nga gibituonan ni Jet Lee maoy gisalida. Apan taud-taud, nananghid ang inahan ni Arman nga mouna na og katulog kay giduka. Sila na lang si Saling ang nahabilin.

Nagkalingaw sila og sultihanay samtang nagtan-aw sa salida. “Nananghid ka ba sa imong boyfriend nga manarbaho ka dinhi sa siyudad Ling?” nagpalain si Arman og topic sa ilang panagsultihanay.

Ingon sa mauwawon si Saling nga mitubag. Wala g’yud kuno misugot ang boyfriend ni Saling nga molangyaw siya sa siyudad apan panarbaho man ang iyang tumong mao nga wala g’yud siya magpapugong. (Sumpayan)