Housemaid

Buntag sayo miabot na si Arman sa bus terminal sa barangay Subangdaku gikan nga miduaw sa iyang kabanayan sa Daanbantayan.

Kaniadto silang duha g’yud ug ang iyang asawa maoy mobisita sa probinsya matag semana santa. Apan karon nag-inusara na lang si Arman kay namatay man ang iyang asawa siyam pa lang ka buwan ang nakalabay. Nabiyudo si Arman sa pangedaron pa lang nga 31-anyos. Pagkanaug niya sa bus, wala dayon siya moderitso og pangita’g kasakyan. Mihapit usa siya sa usa ka painitan ug mi-order og coffee. Nadapit ang pagtagad ni Arman sa mga tawo nga midugok sa usa ka batan-ong babaye. Nagpakisayod siya sa tindera’g painit ug nahibaw-an ni Arman nga nabuwag diay ang maong dalaga sa iyang kauban. Human mainom ni Arman ang iyang coffee, mipaduol siya sa nagpundok nga mga tawo. Dunay uban sa mga tawo nga mihatag og tambag sa dalaga, apan duna sa’y uban nga mibugal-bugal. “Palihug ayaw ninyo siya bugal-bugali bay, angay man gani nato siya nga tabangan,” giingnan ni Arman ang mga tawo nga misugod na sa pagbugal-bugal sa naghilak nga dalaga.

Nagpakisayod si Arman kun nganong nabuwag ang dalaga sa iyang mga kauban.

“Mihunong ang gisakyan nako nga bus sa Liloan kay mipainit ang drayber, nanaug sab ko kay mipalit ko’g pan. Pagbalik nako, dunay sakyanan nga miaginod na sa pagdagan ug tan-aw nako mao g’yud ang kolor sa akong gisakyang bus. Midali ko’g sakay apan dili diay kadto ang gisakyan nako nga bus,” matud sa dalaga.

“Layo na kaayo ko dihang akong nasayran nga kauban ra diay sa bus nga gisakyan nako gikan sa probinsya kadtong akong nasakyan sa Liloan. Gihunong ko nila ug misakay ko’g jeep balik sa Liloan apan wala na usab didto ang bus.”

Nakapanglingo-lingo si Arman sa sitwasyon sa dalaga. “Wala ka ba diay masayod kun asa ang inyong padulngan? Mahimong tabangan ka namo nga matultolan ang imong adtoan,” giingnan ni Arman ang dalaga.

“Nalimot ko sa giingon sa akong mga kauban basta Mandaue kuno mi manaug. Wala man ‘sab gud sila’y selpon,” mihunong na paghilak ang dalaga. “Mag-unsa diay unta mo dinhi sa siyudad Day?” gipangutana ni Arman ang dalaga.

“Manarbaho unta ko isip katabang sa balay,” hinay’ng tubag sa dalaga. “Kun mao, didto na lang ka sa balay pagtrabaho kay nangita usab ko og katabang. Mosugot ka?” gisukna ni Arman ang dalaga. (Sumpayan)