Igo gayod nga nahuman pagsulat ni Salie ang iyang report sa dihang migawas si Allan gikan sa photo section. Miduol kini kaniya ug gihatag ang mga hulagway nga iyang gikinahanglan.
“Thank you,” matud niya ngadto kang Allan.”
Si Allan mibiya dayon sa nahimutangan ni Salie. Wala na sundi sa panan-aw sa dalaga kun diin paingon ang ulitawo. Gibasa niya ang bag-ong nahuman pagsulat niyang report. Gisubli-subli pagbasa. Mibati og katagbaw si Salie human mabasa ang gisulat niyang report. Mitindog siya. Dala ang sinulat nga balita, misulod siya sa lawak sa ilang editor-in-chief aron i-submit ang iyang report.
Sayo nga nahiuli si Salie nianang pagkahapon. Menos kinse para alas singko nahiabot na siya sa iyang gipuy-an. Gidiretso niya ang awto sa garahe.
Sa dihang misulod na siya sa pultahan sa sala sa nagmingaw nga balay, nabati niya nga may sakyanan nga mihunong sa tungod sa gate. Midali siya pagpaingon sa gate. Giablihan niya ang pultahan nga agianan sa tawo aron pagsusi kun kinsa ang nahiabot. Ug mao na lang ang pagpanagko sa iyang mga mata. Maoy misugat sa iyang panan-aw ang bayhon ni Chief Inspector Yuri Cuyos nga maoy pagkanaog sa renegade jeep niini. Midali kini pagduol kaniya.
“Maayong hapon, Salie,” nangatahoran ang batan-ong alagad sa balaod kaniya.
Wala motingog si Salie. Wala usab siya motan-aw kang Yuri. Dihay kalagot nga miinanay pagbulto sa iyang kahiladman. Nahinumdom siya sa pagtawag sa ulitawo kaniya sa telepono kaganinang buntag. Mao kadtoy iyang gikalagotan.
“Salie, ania ako kay...”
Wala matiwas ang buot untang isulti niini. Gibiyaan ni Salie ang ulitawo. Misutoy siya paingon sa sulod sa balay.
“Salie, kadiyot lang,” ni Yuri pa nga miagpas kaniya. -- Sumpayan pa