Giduol ni Pedro si Merlyn nga nagtindog atubangan sa simbahan sa Minglanilla. Nakita ni Pedro nga gigunitan ni Merlyn ang iyang selpon. Masabtan nga duna kini kontakon.
Gilipot ni Pedro si Merlyn aron dili siya diritso nga makit-an. Diha na siya sa luyo sa dalaga nga wala makabantay sa iyang pag-abot. Gikuot ni Pedro ang iyang selpon ug giteksan si Merlyn.
Iyang giteksan ang dalaga nga anaa na siya sa palibot ug nakakita na kini kaniya. Nadungog ni Pedro ang pagtingog sa message alert sa selpon ni Merlyn. Gibasa dayon sa dalaga ang mensahe ug naglingi-lingi kini sa palibot.
Giyungyong og gamay ni Pedro ang gisul-ob niya nga kawo dungan sa pagduko apan ang mga mata niini didto gihapon nagpasiklap kang Merlyn. “Kumusta Mer. Ako ang imong textmate nga si Pedro,” nagpaila na g’yud si Pedro sa dalaga.
“Peter? Wala ka pa g’yud diay matagbaw sa pagbinuang nako?” may gamay’ng kapintok sa tingog ni Merlyn. “Sori kaayo Mer nga giusab nako og gamay ang akong ngalan kay nahadlok ko nga dili ka motagad kun imo ko nga mailhan dayon,” ni Peter pa. Pwerteng nakapangayo’g pasaylo ni Peter sa iyang kanhi hinigugma nga iyang gilimbongan kaniadto kapin sa duha ka tuig na ang nakalabay.
“Sori kaayo Mer. Tuguti nga dugtungon nato pagbalik ang nabugto nato nga pagminahalay ug laumi nga karong higayona lunlon kalipay na ang atong matagamtaman. Buwag na kami sa kanhi nako girlfriend,” giingnan ni Peter si Merlyn.
Wala motingog si Merlyn. “Human sa tambongan nato karon nga sugat, mouban ko nimo sa imong giabtan ha? Please ayaw ko balibari Mer. I love you,” daw nanguyab pagbalik si Peter sa dalaga.
Naglibog si Merlyn. Gusto niya nga balibaran si Peter nga gustong mouban kaniya apan nahuna-huna usab niya ang kamalipayon niya kaniadto panahon nga sila magparayganay sa ibabaw sa kama.
Sanglit kaadlawon pa man sugdan ang sugat, nangita usa sila si Merlyn ug Peter og dapit nga ilang kalingkoran. Sa ilang panagsultihanay, inanay nga nadugtong pagbalik ang nabugto na unta nila nga mga pagbati.
Wala g’yud sila batia og duka nga nagpaabot sa pagsugod sa sugat. Malipayon sila nga misaksi sa sugat. Human sa kalihukan. “Tana Mer, tua didto ang akong motor atubangan sa police station,” ni Peter pa.
“Ihatud ko nimo sa balay? Sa Cansojong, Talisay ko karon magpuyo. Tana kay giduka na ko,” matud ni Merlyn nga miangkas sa motor ni Peter ug migakus na sa hawak sa ulitawo. (Kataposan)