Gula 4
"Peds? Wala ko magdahum nga manguyab ka nako," mubo nga tubag ni Merlyn. Gikulbaan si Pedro kay basin og masuko kaniya si Merlyn ug dili na unya mosugot nga magkita sila atul sa sugat inigka Domingo.
Wala na siya mo-text pa kang Merlyn ug wala na usab siya makadawat og laing message gikan sa dalaga. Hangtud nga nakatulog siya.
Pagka-ugma Sabado, sayo nga mibangon si Pedro. Giteksan niya si Merlyn sa naandan niya nga morning greetings, apan may pakapin na nga pulong. "Good morning my love." Lahi sa kasagaran nga makadawat dayon og reply si Pedro gikan kang Merlyn, karon taud-taud nga wala siya'y nadawat nga tubag. Misamot ang gibati niya nga kakulba nga nasuko g'yud si Merlyn kaniya.
Tibuok adlaw nga Sabado nga wala sila magbayloay og text message si Merlyn ug Pedro. Nalantawan na ni Pedro nga dili madayon ang ilang panagkita sa kanhi niya girlfriend atul sa sugat.
Apan pagka hapon, nakadawat si Pedro og text gikan ni Merlyn. Gikulbaan si Pedro sa pag-open niya sa inbox aron basahon ang message. "Asa g'yud ta dapit magkita unyang kaadlawon? Unsa nga oras g'yud kay daghan ra ba'ng tawo," ni Merlyn pa.
Nahuwasan si Pedro sa gibati niya nga kakulba kay wala diay mausab ang huna-huna ni Merlyn nga sila magkita. Gusto ni Pedro nga magkita sila si Merlyn og sayo aron taas ang higayon sa ilang panag-uban.
"Alas 10 gabii ta magkita atubangan sa simbahan sa Minglanilla," iyang giingnan si Merlyn. Gitug-anan ni Pedro si Merlyn kon unsay iyang isul-ob. "Ok. Mailhan ko nimo kay mag-T-shirt ko'g red," reply ni Merlyn.
Tulin kaayo ang pagtuyok sa orasan. Alas nueve na sa gabii mao nga nag-ilis na si Pedro ug giandam na niya daan ang iyang motorsiklo. Wala pay alas 10 sa gabii, didto na siya sa Minglanilla ug daghan nang tawo.
Didto gibilin ni Pedro ang iyang motor duol sa police station ug mainampingon siya nga milakaw paingon sa atubangan sa simbahan. Giabtik niya ang iyang mga mata kutob sa babaye nga nagsul-ob og red T-shirt iyang gitan-aw.
Wala g'yud mosipyat si Pedro, si Merlyn kadtong babaye nga nagtindog nga nag-inusara atubangan sa pultahan sa simbahan. Mikuba pag-ayo ang iyang dughan dihang hinay siya nga nagpaingon sa nahimutangan sa dalaga.
Sa iyang tan-aw, wala gihapo'y kausaban ang panglawas niini. Nagpabilin ang kaanyag ni Merlyn. (Sumpayan sa Domingo)