Sugat

Naglibog si Merlyn kun angay ba nga tangdoon niya si Peter nga gustong mouban kaniya sa iyang giabtan nga apartment human sa ilang pagsaksi sa sugat sa pagkabanhaw sa Ginoo.

Ingon sa tinuod g’yud ang panultihon nga dunay uban nga motambong sa sugat nga himoon sa kaadlawon sa unang Domingo human sa Biyernes Santo nga ang tinuoray’ng tumong mao ra ang pakigsugat sa uyab.

Kabalibaron si Merlyn sa hangyo ni Peter nga mouban kini kaniya sa apartment, apan nahuna-huna usab niya ang mga panghitabo kanila kaniadto dihang kanunay pa sila nga mag-uban pagsulod og motel.

Kontento kaayo si Merlyn sa dinad-an ni Peter atul sa ilang mga pagparayganay kaniadto ibabaw sa kama. Kini maoy rason nga mora’g kabalibaron siya apan may migitib usab nga talagsaong kahinam sa sunod nga panghitabo kun tugotan niya si Peter nga moadto sa iyang giabtan.

“Ayaw ko balibari Lyn ha?” hagawhaw ni Peter kang Merlyn.

Nagkabuwag sila si Merlyn ug Peter diha nga ang lalaki nasakpan sa dalaga nga nangulitawo’g laing babaye. Tulo na kadto ka tuig ang nakalabay gikan sa ilang panaglagyo.

Ang Banat News maoy nakatabang nga magkatagbo pagbalik ang ilang mga dalan.

Nagkalingaw’g basa-basa si Peter sa Banat News usa ka higayon niana ug nabasahan niya ang ngalan ni Merlyn apil ang iyang numero sa selpon nga napatik sa Banat Inbox.

Giteksan dayon ni Peter ang numero apan wala siya magpaila. Nagbayloay silang duha og mga mensahe sa text. Gipalamian g’yud og estorya ni Peter si Merlyn, apan migamit siya sa ngalang Pedro.

Matag buntag, dili gayud malimot si Pedro sa pag-greet ni Merlyn. Nagtrabaho na si Merlyn isip promo girl sa usa ka kompaniya ug nadistino siya sa usa ka higanteng mall sa North Reclamation Area.

“Kanindot nimo Pedro uy d ka mn gyd malimot nako sa imong pagmata matag buntag,” ni Merlyn pa sa usa sa iyang mga tubag sa good morning greetings ni Pedro.

“Ingon g’yud niana ang usa ka lalaki Mer basta mahigugma,” reply ni Pedro sa text message sa dalaga. Nagsingabot niadto ang semana santa ug nagkasabot ang duha nga magkita atul sa sugat. (Sumpayan)