Mata sa kasingkasing

Hapon na silang namauli gikang nangaligo sa dagat. Pag-abot ni Angeline sa boarding house, nakugang siya kay mao may iyang naabtan si Erik nga naglingkod sa sala.

Mipahiyom si Erik sa pagkakita niini kaniya. Wala na lang molahos si Angeline ngadto sa iyang kuwarto. Giatubang na lang niya ang ulitawo.

“Maayo kay nahiabot kana,” ni Erik pa. “Kaganina ra kong nagpaabot nimo. Nangaligo man kuno mo’g dagat?”

“Oo,” mubong tubag ni Angeline. “Kami ni Vera.”

“Kamo rang duha?”

“H-ha? A-aw, ku-kuan...”

“Kuyog tingali ninyo si Robert, no?”

“Oo. Daghan mi. Kauban namo ang iyang mga klasmet sa P.E.”

“Ingon na gyud diay niana ang inyong ka-close? Mora’g hugot na gyud tingali kaayo ang inyong bonding.”

Wala motubag si Angeline. Nangita siya’g paagi nga motipas ngadto sa laing tema ang panagsulti nila ni Erik.

“Tuod,” ni Angeline pa. “Nganong nia ka man?” -- Sumpayan pa