Man Hater

Gula 83

“Hello?” sa dalaga pa.

“Salie,” ni Yuri pa. “Si Yuri kini.”

“Uy, Yuri,” ni Salie, “ikaw man diay. Unsay ato?”

Wala motingog si Yuri. Naghunahuna siya’g unsay maayong itubag sa pangutana sa dalaga. Kanang tubag nga dili makapainit sa ulo niini. Buntag pa ra ba ug dili siya buot nga maguba ang adlaw sa dalaga.

“Yuri?” matud ni Salie sa dihang wala gayod siya motingog. “Yuri, anaa ka pa ba?”

“Y-yes, Salie,” dali siyang mitubag. Nahadlok siya nga tingalig ibutang na sa dalaga ang telepono kun dili gihapon siya motingog.

“Nahilom ka man gud,” sa dalaga pa.

“M-mitawag ko nimo kay...” wala niya matiwas ang buot niyang isulti. Nagduhaduha siya sa pagbungat.

“Unsa, Yuri?” ni Salie.

“G-gusto kong makadungog sa imong tingog,” mao ray nalitok ni Yuri. Ang iyang dughan daw gilubok sa kapid-an ka mga alho.

Wala motingog si Salie didto sa pikas tumoy sa telepono.

“Salie, pasayloa ko,” matud ni Yuri sa tumang kamapainubsanon. “Nasayod ko nga supak sa imong kabubut-on kining akong gibuhat. Apan dili ko kapugngan ang akong kaugalingon. Igo lang akong nagsunod sa sugo sa akong kasingkasing. Gihigugma ko ikaw.”

“Pila na ka babaye ang gisultihan mo’g ingon niana, Yuri?” may tuno sa kaitok ang tingog ni Salie nga misukna kaniya.

“Tinud-anay kining ako, Salie,” ni Yuri pa. “Hatagi ako’g higayon nga ikapamatuod ko kanimo ang katim-os sa akong gugma.”

“Mao gyud mong mga lalaki,” matud ni Salie. “Kusog mopatuo nga matinud-anon. Apan kun inyo na ganing maangkon ang gugma ug pagsalig sa babaye, inyo kining pahilakon.”

“Dili ang tanang mga lalaki ingon niana ka salbahis, Salie,” mahuyo ang tingog ni Yuri. -- Sumpayan pa