Ang Bayani

Gula 7

Daw nalum-oy si Liza nga nakatilaw sa makabuang nga romansa ni Mindo samtang sikit sila kaayo nga nagtupad pagpanglingkod niadtong gamay'ng tindahan sa mga prutas sa dalaga.

Nagkamingaw na kaayo ang palibot tungod sa nagkalawom na nga kagabhion. Gipasiklapan ni Mindo ang iyang relo ug nakita niya nga hapit na g'yud mo-tungang gabii.

Tungod sa kamingaw sa kagabhion, madungog usahay ni Mindo nga moagulo og panagsa si Liza samtang padayon niya kini nga gikumbati. Ang panagsa nga agulo nga madungog niya gikan sa dalaga nagsugnib og kadasig ni Mindo.

"Min, kasuk-an g'yud ko ni Papa kun mahibaw-an niya kining atong gibuhat," matud ni Liza dihang milunga kadiyot si Mindo sa pagromansa sa dalaga. "Ayaw kabalaka Liz, andam ko nga mangasawa nimo," giingnan ni Mindo si Liza.

"Tinuod ka?" paraygon ang tingog sa dalaga. "Wala ko magkomedya Liz, na love at first sight ko nimo, mao gani nga pagkakita nako nga gibinuangan ka sa mga bugoy ganinang buntag, nanaug ko sa gisakyang bus ug mibalik aron ka tabangan," ni Mindo pa.

Ning higayuna si Liza na g'yud ang migakus pag-ayo kang Mindo. Nakapasamot kini sa kainit sa ulitawo nga mipatagamtam sa dalaga og kalalim pinaagi sa romansa. Mikiat ang mga kamot ni Mindo sa pagpanghiram sa kalawasan sa dalaga.

Misamot nga nalum-oy g'yud si Liza sa nagkagrabe na nga pagromansa kaniya ni Mindo. Kini pa ang unang higayon nga nakatilaw siya'g parayeg gikan sa usa ka lalaki. "Ayaw Min, ayaw… ayaw malooy ka," nagkaputol-putol ang hinay'ng tingog ni Liza dihang gihikap ni Mindo ang labing pribado nga parte sa lawas sa dalaga.

"Pangasaw-on tika Liz… unya adto na kita mamuyo sa siyudad," gihunghongan ni Mindo ang dalaga. Wala na mopalag ang dalaga sa gihimo kaniya ni Mindo.

Nasiguro si Mindo nga wala nay mga tawo pa nga moagi sa maong dapit tungod sa kalawom na sa kagabhion. Gidimdim g'yud ni Mindo ang katam-is ni Liza ug namatud-an g'yud niya nga siya pa ang unang hinigugma niini ug lalaki nga nakaabot sa iyang gingharian.

Mapinanggaon nga giagbayan ni Mindo si Liza tabok sa karsada paingon sa ilang balay. Nasugatan nila ang amahan sa dalaga. Giwakli unta ni Liza ang kamot ni Mindo nga nag-agbay kaniya, apan gibalik kini sa ulitawo.

"Noy Delfin nadugay-dugay mi'g uli kay nagsultihanay pa kami si Liza. Salamat nga napadpad ko dinhi sa inyo Noy kay dinhi nako nakit-an ang akong pangasaw-onon," giingnan ni Mindo ang amahan sa dalaga. (Kataposan)