Ang Bayani

Gula 5

Pwerteng sikata ni Mindo sa maong kalingawan nga ilang gitambongan. Wala malilong sa nagdumala sa kalingawan nga si Mindo ang nakabadlong sa pundok sa gikaintapang mga bugoy nga dili na magsamok mao nga gihatagan siya og pagyukbo.

“Sikata nimo uy. Kun molansar ka’g kapitan dinhi sa among barangay modaug ka g’yud,” gikomedyahan ni Liza si Mindo. Igo lang mipahiyom si Mindo nga nakadungog sa bulatik sa dalaga.

“Ikaw ang nakapasikat nako kay kauban man ta. Tan-awa, buotan na kaayo ang mga bugoy nga nag-inom sa tindahan,” giingnan ni Mindo si Liza. Taud-taud, miapas ang mga ginikanan ni Liza.

Midayeg kini pag-ayo kang Mindo ang amahan sa dalaga nga nasayud sa nahitabo. “Swerte g'yud si Liza nga kamo'y kauban sir kay wala g'yuy magbugal-bugal kaniya,” matud sa amahan nga si Delfin.

Nanayaw sila si Mindo ug Liza. Nabantayan ni Delfin nga daghang mga mata ang naniid lang kanila. “Liza mouna lang kami pagpauli kay nasayud ka na, misiaw ra ba ang kawat sa ato panahon sa gabii,” matud sa amahan niini.

“Isalig lang namo si Liza nimo sir, hinoon mirespetar man kanimo ang mga bugoy diri sa amo mao nga luwas si Liza kun kamo ang kauban,” giingnan si Mindo sa inahan sa dalaga.

Igo lang miyango-yango si Mindo apan sa hilom gikahinangop niya nga miuna sa pagpauli ang mga ginikanan sa dalaga. Miadto sila si Liza sa usa ka tindahan ug namalit og pagkaon, dayon miinom og bugnaw nga softdrinks.

“Mao na ba kana siya Liz?,” gikomedyahan si Liza sa nagbantay sa tindahan. Nakasabot si Mindo sa gipasabot sa tindera. “Dili pa Nang uy, bisita siya namo kaganina lang buntag,” ni Liza pa.

Gitan-aw ni Mindo ang tindera. “Pareson ba kaming duha   Manang?” Mipahiyom ang tindera ug mitutok kanila. “Angayan g'yud kaayo, mga gwapo ug gwapa.”

Gilingi ni Mindo si Liza. “Adto na mi Nang uy kay nakapabugnaw na man mi,” matud ni Mindo dayong agbay ni Liza .

“Abi nimo Liz, wala g'yud ko magmahay nga napadpad dinhi sa inyong dapit kay nakaila ko ikaw,” ni Mindo. “Ngano man kuno bi?” daw may pagka paraygon ang tingog sa dalaga.

“Nakabantay ko nga may pagbati ko nimo Liz.. Kana ba nga gitawag nila og Love at first sight,” matud ni Mindo sa kalma nga tingog. Samtang nag-agbay si Mindo kang Liza, nabantayan niya nga mora'g nangurog ang abaga sa dalaga. (Sumpayan)