Man Hater

Gula 80

Wala motingog si Mr. Cuyos.

“Apan aduna sab gayod hinuoy mga kaso nga malisod sulbaron,” mipuno sa pagsulti si Yuri. Niining tungora, nahinumdom siya sa kaso sa misteryosong kamatayon ni Debbie Balatan.

Naputol ang panagsulti sa amahan ug anak sa dihang miabot sila si Mrs. Cuyos ug Rose sa kan-anan. Nakailis na si Rose alang sa pagtungha. Mipahiluna gilayon ang duha sa bakanteng mga lingkoranan.

Naandan sa ilang pamilya nga mag-ampo una sa dili pa mangaon. Mao kini ang namat-an og mahayag nilang managsuon. Ang ilang amahan gayod maoy mangulo sa pag-ampo sa pagpasalamat sa Dios sa grasya nga ilang pagasaw-an.

Nag-ampo sila nga piniyong ang ilang mga mata.

Human sa hamubong pag-ampo, nangaon na sila.

Wala sila’y timik samtang nangaon.

Dangtan og pipila ka gutlo sa ilang pangaon, si Yuri namulong.

“Kumosta ang imong pagtuon, Rose?” gisukot niya ang iyang manghod.

“Maayo man, Kuya,” daling tubag ni Rose nga mihunong sa paghungit ug mitan-aw kaniya. “Tag-as kaayo ang akong grado.”

“Good,” nakaingon si Yuri nga nahimuot. “Kinahanglang makatapos ka gayod sa imong pagtuon aron makatabang ka na kanila ni Papa ug Mama.”

“Ug ikaw usab, Yuri,” misal-ot si Mrs. Cuyos sa panagkabildo sa managsuon, “gusto kami si Papa mo nga kun makatapos na unya si Rose sa pagtuon, magminyo ka na aron mahaluna na.”

Kalit nga mibati og kasubo si Yuri sa iyang nadungog gikan sa iyang inahan. Nahinumdom siya kang Salie, ang babaye nga iyang gihalaran sa putli niyang gugma. Kun dawaton lang ni Salie ang iyang gugma, mao na gayod kini ang iyang dad-on ngadto sa altar sa kaminyoon.

Apan mahitabo kaha kini nga ingon sa layo man kaayo ang pagbati ni Salie kaniya? Masuko man gani kini kun maghisgot na siya bahin sa gugma. Unsaon niya sa pagpasugot ang dalaga? -- Sumpayan pa