Magminyo na ko ma

Pagka-cute gud anang imong anak, nang Luming,” matud ni Lanie. “Pila na bay edad niana?”

“Dose, ngano man diay?”

“Sus! Giingnan ko Nang, nga mangasawa siya nako.”

“Ha! Tinuod?” Nahikatawa si Luming. “Unya, unsa may imong tubag?”

“Ako siyang giingnan nga bata ka pa Dong. Unya na lang kun dako kana.”

“Pila naman diay imong edad?” ni Luming.

“Desi otso. Ako siyang giingnan ini.”

“Unya, unsay iyang sulti?” Nahimuot si Luming.

“Iya kong giingnan nga, “sige, ha, huwata ko inigdako nako kay akong ingnon si mama nga magminyo na ko.”

Dugay na kadto. Ulitawo na si Dodong ug tapos na sa pagka-mechanical engineer. Wala na usab si Lanie sa Cebu ug may balita nga tua na kuno sa Manila ug masakiton.

“Dong, nganong kanunay ka mang maghinuktok? Unsa may imong problema? Sultihi ako,” pangutana ni Luming.

“Akong gihunahuna si Lanie, Ma, kun hain na intawon to siya karon!”

“Nganong si Lanie man ang imong gihunahuna nga kadaghan dihang babaye. Naa si Eden, si Fe, si Ester o kaha si Maricar.”

“Mahal ko si Lanie, Ma, sukad pa kaniadto sa gamay pa ko. Dili ko mahimutang kun dili ko siya nakita. Misaad usab siya nga iya ko nga hulaton.”

“Motuo ka man sa iyang saad, Dong nga kadugay na ato! Basin kapila na to maminyo si Lanie, Dong.”

“Pangitaon ko lang gyud si Lanie, Ma. Adtuon nako’s Manila kay tua man kuno didto.”

“Ha, hala, kun maoy imong gusto, di ta ka pugngan.”

Milarga si Dodong paingon sa Manila ug didto nakit-an niya si Lanie sa ospital sa PGH. May sakit kini sa baga. Daot na kaayo kini ug hapit wala na makaila si Dodong niini. Apan sa dihang nailhan niya kini, iya kining gigakos.

“Lanie! Lanie! Misaad ka nga imong akong hulaton,” ni Dodong kansang mga luha midaligdig sa iyang mga aping.

“Ikaw ba si Dodong? Sus, kaguwapo na nimo, Dong! Liwat ka man gyud ni Val. Gihulat ko ikaw, Dong, apan nasakit ako. Ambot may kaayohan pa ba ni!”

“Ayohon ka sa akong pagmahal, Lanie, buhion ka sa akong paghigugma. Sukli ang imong sakit, Lanie. Pagpakabuhi alang sa akong gugma nimo!”

“Oo, Dong, oo!” ni Lanie nga migakos paghugot sa ulitawo.

“Pila ka adlaw lang, mibaskog si Lanie nga kanunay puno sa bitamina ang pagkaon. Usa ka adlaw may gisulti si Dodong kang Lanie.

“Mamauli ta sa Cebu, Lanie. Ug sultihan nako si mama nga magminyo na ko!” (Katapusan)