Ang Bayani - Gula 3

Miabut didto sa tindahan ang Mama ug Papa ni Liza. “Salamat kaayo sir nga miabot ka kay kanunay ra g’yud tawon binuangan si Liza nianang maong mga bugoy kun wala kami dinhi sa tindahan,” matud sa amahan sa dalaga.

“Liza ubani si sir didto sa atong balay para adto lang ta maniudto. Ipaihaw nako ni Mama nimo kadtong manok nato nga dumaga,” giingnan si Liza sa iyang amahan. “Ayaw na lang sir, salamat kaayo,” ni Mindo pa nga mauwawon.

“Ayaw mi balibari sir, agi kini og pasalamat namo nimo. Ako diay si Delfin,” matud sa amahan ni Liza nga mipikpik sa abaga ni Mindo. Wala makabalibad si Mindo sa pagdapit kaniya.

“Ako na la’y ihaw sa manok Liz, atimana lang na si sir diha, pagsultihanay lang kamo diha sa balkon,” matud sa Mama ni Liza nga misignit dayon sa dumaga nga manok sa tangkal.

Sa tanto nga panagsultihanay nila ni Mindo ug Liza, nalitok sa dalaga nga gusto unta siya nga manarbaho sa siyudad. Gitug-anan niya si Mindo nga nakahuman siya’g third year college sa kurso nga education apan nahunong tungod sa kaapiki sa gasto.

“Sige Liz, tabangan tika nga makatrabaho sa City Hall. Akong hangyoon ang mayor ug magpatabang kita sa akong amigo nga si city administrator Jomar Poblete ug Dr. Lucelle Mercado,” giingnan ni Mindo ang dalaga.

“Tinuod ka? Salamat daan sir ha?” mibathay g’yud ang pahiyom ni Liza nga nakadungog sa pasalig ni Mindo.

Taud-taud, miabut sa balay ang amahan ni Liza. “Ako lang gipabantayan sa akong manghud ang tindahan kay aron madali ang pag-andam sa atong makaon,” matud ni Delfin nga nagbitbit og duha ka botelya nga grande.

“Pa, tabangan ko ni sir nga makatrabaho sa Cebu City Hall kay suod man diay kuno niya si mayor Mike Rama,” giingnan ni Liza ang amahan.

“Maayo kun mao kana..mora diay og hulog sa langit nimo si sir kay gawas nga giluwas ka’s mga bugoy patrabahoon ka pa,” matud ni Delfin.

Nagsawo sila sa paniudto. “Tukma kaayo sir kay may kalingawan sa baryo karong gabii,” matud sa amahan ni Liza. “Bitaw sir, estar usa dinhi sa among lugar kay daghan ra ba kaayo’g mga gwapa dinhi,” dugang pamahayag ni Liza.

Nakapahiyom si Mindo. “Sige ugma na lang sa buntag ko modayon sa Pinamungajan.” Mibalik ang Mama ni Liza sa tindahan daplin sa karsada, samtang ang amahan niini mipahuway sa lantay ilawom sa dakung kahoy. (Sumpayan)