Ang Bayani

Nagsakay og bus si Mindo aron mobisita sa iyang mga paryente didto sa barangay Hingatmonan, Balamban.

Apan mihunong ang iyang gisakyang bus atubangan sa usa ka tindahan og mga prutas nga nahimutang daplin sa karsada sa usa ka dapit sa Naga. Dunay pasahero nga misakay apan ang nakapadani sa pagtagad ni Mindo mao ang babaye nga naghilak.

Nasabot niya nga ang tindera kini sa mga prutas mao ang naghilak. Dunay usa sa mga lalaki nga nag-alirong paglingkod sa babaye nga miagbay kaniya apan giwakli kini niadtong babaye nga naghilak.

Milarga ang bus ug kadtong babaye nga pasahero nga misakay diha mitupad paglingkod ni Mindo. “Ngano diay nga naghilak man kadtong babaye nga naninda og mga prutas didto sa imong gisakyan?” gisukna ni Mindo ang babaye’ng mitupad kaniya.

“Ay, nabiktima na usab sa mga bugoy. Daghan na kaayo sila og nakaon nga mga prutas pero walay klaro kun mobayad ba unya gisungog nga hagkan nila kadtong tindera,” matud sa pasahero.

Nakahukom si Mindo nga manaug sa bus. “Bay, dia ang akong plete, manaug ko,” matud ni Mindo nga abtik kaayong nakasambilay sa iyang laptop bag sa iyang buko-buko.

Sanglit layo-layo na ang gidaganan sa bus, gipara niya ang nagsingabot nga motorsiklo. “Pasakya ko Dong, anha ra sa unahan nga baligyaanan og mga prutas.”

Didto g’yud gihunong si Mindo sa atubangan sa tindahan. “Salamat kaayo Dong,” gipikpik ni Mindo ang abaga sa batan-ong drayber sa motorsiklo. Nagsigi og pangatawa ang mga lalaki nga diha sa payag-payag.

Lima ka lalaki nga mga bugoy og panagway. Naghilak gihapon ang babaye nga natagbaw og wakli sa pag-agbay sa usa sa mga lalaki nga dakuon og lawas. “Tagpila ning saging tundan day,” nagpasumangil si Mindo pagpangutana.

Mitindog ang tindera. Wala pa gani makatubag ang tindera nga nagpamahid sa mga luha, mipaksi na si Mindo og saging dayon iyang gikaon. Nagpasumangil siya nga gigutom apan gitan-aw niya ang lima ka lalaki.

“Nganong naghilak ka man Day? Gibinuangan ka nila?” gipangutana niya ang tindera.

May hitsura tinuod ang tindera mao tingali nga naibgan sa mga bugoy. “Daghan na kaayo sila og gikaon sa akong baligya apan dili mobayad, unya mamugal-bugal pa g’yud,” matud sa tindera.

“Sige lang, pabayron nato sila sa ilang nakaon nga mga prutas,” giingnan ni Mindo ang tindera samtang milingkud siya sa tumoy sa lingkoranan. Nahilom ang lima ka lalaki apan isog kini nga mitutok kang Mindo. (Sumpayan)